قبل 10 أيام تقريبا مرضت أنا و زوجي .. حمى و التهاب في اللوز
أغلب الوقت و احنا عالفراش . إذا خفيت شوي أقوم أشوف زوجي و هو نفس الشي
و أهله و لا حد اهتم .. و الله مقهورة على نفسي
أول يوم تميت من فالليل و انا مريضة لين س 3 الظهر . طلعت و هم عارفين بالمرض و توني ما وصلت للصالة الا عمتي تعطيني تفاح مسلوق و تقول لي أكلي بنتج
علاقل خلوني اقعد و اخذ شي اكله .
بعدها نومت بنتي و نمت و رجعت الحمى .. من نشت بنتي طلعتها من الغرفة و بصراحة هم يلعبونها خصوصا عمتي و تاكلها اذا كلو .. صح بنتي يبالها مسايسة و لعب وقت الاكل لكن بشكل عام ياكلونها شوي
طلعت لها بامبرز و منشفتها و خبرت بنتها الوسطانية انه اذا محتاجة تبديل بدلولها . و رجعت الغرفة و هي شايفة حالتي يادوب امشي .. و زوجي عالفراش بنفس الحالة
اسمع صوتهم يلعبون معاها شوي صاحت و صاحت فعرفت انه ما بدلولها .. طلعت و بدلتها
وبعد فترة يدقون علي الباب تعالي بدليلها
للعلم عمتي احيانا تبدل لها لو كانت عندها و انا اطبخ مثلا
والله اشفقت لحال نفسي .. كنت حاطة فبالي اقولها تنومها عندها لانه يادوب اشل نفسي و امرض زوجي .. لكن كنسلت
بتقولون ليش ما رحتي لاهلج .. لاني غبية و هبلى .. كنت احاتي زوجي
و اللي قهرني زيادة انه بعد ما تحسنت .. صرت اشوف نظرة التقصير في عيون عمتي
صار موقف بعد ما تحسنا ...
زوجي تم ممدد فالغرفة و عالتلفون .. فالعصر سالته تبا تشرب شي .. قال لي لا
عالمغرب طلع و قعد مع اهله فبدا الكلام ... قاعدين فالغرفة ليش ما تقوم ادوره تسوي له شي يشربه ..الخ
قلتلها هو ما يبا
شوي وقامت سوتله عصير برتقال فريش .. والحبيب بالاول يقول لا مااقدر بلاعيمي مجرحة وشوي القلاص فاضي
انا مرضت محد سوالي سالفة و الله محد سال اكلت و الا شربت .. بالعكس يقولولي حطيله عشا .. سويله عصير سويله شوربة .. يعني من اخف اقوم اخدم ولدهم
وفوق ها مب عاجبنهم
ااااااه صدق اني هبلى
بدت مشاعر كره لزوجي من هالجو اللي عايشتنه ... شو هالدلع
اهم شي مصلحة ولدهم
شالة بقلبي .. و ابا احط حدود .. ابا اعرف كيف اتصرف
طبعا اول شي اسويه .. اول ما امرض بروح لاهلي
مشكلتي اراعي مشاعر غيري .. اقول اوه يمكن يزعلوا ليش راحت عند اهلها و نحن موجودين
كيف خلت زوجها مريض ..الخ
اعرف انه في نسبة خلل فيني و فتعاملي .. سذاجتي هي اكبر مشكلة
و حساسيتي بعد و مراعاة غيري
امس اخته الكبيرة تبا تلف ورق عنب و خلت كل ماكن البيت و قعدت فالصالة تلف .. زين بنتي تبا تمشي و تلعب
وامها .. خلو امها تمسكها .. عنزة هي
تروح المطبخ تلف او الغرفة لو ما تبا المطبخ
انقهرت من نفسي لاني ما تكلمت و قلت تروح المطبخ
مع اني اعرف حركات بنتهم الكبيرة .. و كل شوي امااااااه تعالي شوفي ..( بنتي ) .. للعلم بنتي عمرها سنة