أخوي ريان.. الله يرويك من حوض الكوثر يوم الدين..

أخوي الكريم.. إذا تفكر ترجعها وتسامحها علشان الاستقرار وعودة الأمور كما كانت.. لا تتعب نفسك ما راح تقدر..

لو فكرت ترجعها حط في بالك انك تسوي هذا الأمر لله وحده مو لنفسك أو لها.. لله.. شي تلقاه عنده يوم تلقاه.. ثم لشيبة أبوها وجراح أمها وكرامة بناتك الله يحفظهم لك.. هذول مذهولين وما لهم ذنب باللي صار..

تراك يا ريان قتلتها بتعاملك معها وسترك لها وتحملك الألم والجراح والإهانة.. يمكن لو قتلتها بايدك أهون عليها.. لأنها تموت كل يوم لما تقارن اللي سوته باللي أنت سويته.. وانا متأكد دموعها ما بتجف لما تدخل قبرها..

لو فكرت ترجعها ما بتقدر إلا إذا كان الأمر لله مع احتساب صادق للثواب.. ولازم تتزوج غيرها علشان تهدأ نفسك وتحس ان عندك اللي تعفك.. لا تقول ما أقدر اعدد .. إلا تقدر.. ولو قدرت تغير المدينة اللي انت فيها حتى إلى مدينة قريبة يمكن يكون أحسن..

تقدر تجرب لو حبيت .. ولو ما قدرت رجعتها بيت أهلها.. شرط انك تحتسب وتتزوج غيرها..

ما تدري لو قدرت يمكن يكون شي يدخلك الله به الجنة بدون حساب أو عذاب ويرفع درجاتك في عليين.. ولو ما قدرت تراك محسن بسترها وما عليك ملامة.. الله يلوم اللي يلومك..

الله يحفظك وييسر أمرك ويشرح صدرك ويلهمك اللي فيه الخير لك في دنياك وأخراك..
...
..
.

__________________
سأكتبُ شعريَ الباكي ..... بدمع القلب لا الحبرِ
أُسَطِّرُهُ على كبدي ..... وأتركُ دَفْتَرَ الشِّعْرِ
جراحُ أحبتي في الأرضِ ..... تبعثُ عاصِفَ الفِكْرِ