رد: كوفي شوب الصبايا 2 ( المشاركة للنساء فقط
كنارينا كان بيموت أمس!!
تذكرون عصفورين الكناري اللي طاروا مع الريح؟
عقبها اشترينا كناري يديد .. بس طبعاً من بعد حادثة العصفورين اللي قبله ما قمت أطلعه برا أبداً.
الكناري اليديد ما شاء الله تبارك الرحمن عليه تغريد عشرة على عشرة .. أول ما الفجر يطلع تبدأ الوصلة التغريدية بمنهى النشاط والحماس.
لما زوجي رجع من دوامه من كم يوم رد يطلعه برا الصبح!! .. لأنه ما يقدر يرجع ينام بعد الصلاة بسبب صوت الكناري!! .. والحاصل إنه كان يطلعه الفجر ويرجع يدخله البيت الضحى تقريباً.
اللي صار أمس إن زوجي نسى يدخله .. والعصفور تم برا لين الظهر!!!!!!!!!
وتفاجأت بزوجي ماسكه بيده .. والكناري خلاص فطسان وشوي وتطلع روحه من الحر والخنقة!!!!!!
زوجي حس بتأنيب الضمير .. وقام يقول لي: هاتي ماي .. هاتي ماي. 
عطيته ماي شوي شوي .. والمسكين يشرب وينتفض .. بس مب قادر يصلب نفسه .. ولما رجّعناه القفص تم طايح مب قادر يوقف على ريوله.
وزوجي من كثر الندم تم يروح ويرجع عليه ويدور حواليه يبا يتطمن بعده حي والا لا.
أنا تميت ساكتة وما قلت له شي .. وبعدها على طول طلعنا مع اليهال .. لين بدا زوجي يكلم نفسه ويقول: الله يستر ما يكون مات.
قلت له على طول: لو هالعصفور مات بيكون في ذمتك .. وبتكون أنت اللي ذبحته .. حد يخلي عصفور صغيرون مثل هذا تحت الشمس لين الساعة وحدة الظهر؟!!!!!!!! .. وأساساً أنا قلت لك خلاص الدنيا الحين صيف وحر وما ينفع العصفور يطلع برا.
قال: الماي كان مخلص .. لو كان عنده ماي كان حصّل شي يشربه .. أنتو ما تحطون له ماي؟!
قلت: نحط له ماي وأكل كل يوم المغرب .. والمفروض الماي يتم لين ثاني يوم .. لكن لما حضرتك تحطه تحت الشمس أكيد الماي بيتبخر ويخلص!
قال: لو حطيتوا له ماي وايد كان حصل شي يشربه حتى لو تحت الشمس.
قلت له: حتى لو عنده ماي .. ترا بيفور تحت هالشمس .. تباه يشرب ماي مغلي؟!!!!!!!!!!!!!!
المهم طلعنا ورجعنا واحنا حاطين إيدنا على قلبنا ليكون العصفور مات.
ودخلنا البيت وكلنا طيران عند القفص نبا نتطمن.
والحمدلله لقيناه حي يرزق. 
__________________
اللهم طِيبَ الأثر .. وحُسْنَ الرحيل.