رد: كوفي شوب الصبايا 2 ( المشاركة للنساء فقط
بمناسبة الموبايلات.
ابن جيراننا عمره 12 .. أكبر من ولدي بسنتين ,, مترابعين هو وولدي وكل واحد يروح لبيت الثاني أسبوعياً في الويك إند والإجازات .. وهو من الأولاد اللي أهاليهم يعطونهم كل شيء .. ومن كم شهر ولدي خبّرني إن ولد جيراننا صار معاه موبايل (أعتقد بلاك بيري .. وللأمانة أمه عطته موبايل قديم كان عندها .. وما اشترت له واحد يديد).
وولدي كلمني يومها إنه هو بعد يبا موبايل مثل ولد الجيران!
سألته: ليش؟
قال: عشان أكلم ربيعي.
قلت له: بعده بدري يا ماما على الموبايل .. لما تكبر شوي باشتري لك .. وبشرط تييب لي تقارير زينة في المدرسة.
اعترض وقال: شمعنى فلان أمه تييب له وما قالت إنه بعده صغير .. ولا قالت له لازم تكون شاطر!
قلت له: ما عليّ من أمه .. وكل أم تتصرف مع ولدها مثل ما تبا .. وعموماً موبايلي موجود وإذا حبيت تتصل فيه وتكلمه خذ موبايلي وكلمه مثل ما تبا.
انتهى الموضوع من وقتها وولدي ما رجع كلمني فيه أبداً.
من أسبوعين تقريباً تفاجأت إنه يسألني عن البلاك بيري القديم مالي.
قلت له: هذا قديم .. خلاص رميته. (ما رميته فعلاً)
قال: لييييش ترمينه؟!!! .. جان خليتيه عشان آخذه أنا.
قلت له: وليش تاخذه؟
قال: أبا موبايل .. عشان أكلم فلان (فلان هذا يصير ولد خال زوجي .. بعد مترابعين مع بعض وعرفت بعدين إنه طلب من أمه موبايل ـ تقليداً لولد من أهلهم ـ وأمه عطته موبايل قديم عندها)
بصراحة تفاجأت .. لأن زوجة خال زوجي تعتبر شديدة شوي وعندها حزم في مثل هالأمور .. وما توقعت أبداً إنها تعطي ولدها موبايل في هالعمر (عمره 11 سنة) .. وكونها هي بالذات عطت ولدها موبايل ضعّف موقفي شوي .. لأني جدام ولدي كنت معتمدة على فكرة إن محد من أهلنا يعطي عياله موبايلات وهم صغار.
المهم ما استسلمت.
قلت لولدي: إحنا اتفقنا إنه مب وقته الموبايل الحين .. واتفقنا تييب لي تقارير زينة في المدرسة (مستواه نازل هالسنة) .. وقلت لك موبايلي موجود .. وموبايل البيت موجود (هاتف غير ذكي) .. بنخزّن كل أرقام ربعك ووقت ما تبا تتصل بحد فيهم تعال خذ الموبايل واتصل باللي تباه .. ما راح أقول لك لا .. ولما تكبر ويصير الوقت مناسب باخذ لك أحلى موبايل يديد .. وما راح أعطيك مستعمل مثل فلان وفلان.
سكت وما جادلني أبداً .. بس الله يستر ما يطلع لي بقصة يديدة.
__________________
اللهم طِيبَ الأثر .. وحُسْنَ الرحيل.