اليوم بدايته بكاء ... ولما يجي زوجي يكلمني اسكته باشارة يدي
عتابي وصل اقصى قلبه وقطعه كمان
راح دوامه بدون فطور
وانا واصلت بحثي
وراسلني واتفقنا نروح لدكتور اسمه عمر المديفر
بالحرس الوطني وله عياده اسمها العناية بالانسان
وطبعا افضل استشاري بالمملكه
ورحنا له ... ممنوع علينا لان ولدي لسى ماكمل سنتين باقي له عشر ايام
رفضت اتحرك من قدام العياده .. انتظر فقط يفتح الباب وادخل
واول ماشفت المريض طلع
حشرت نفسي ههههههههه
وقلت ياادكتور الله يرضى عليك بس اعطيها طله
شوفه بس
طمني من البارح مانمت
وطبعا انا اليوم علمته شوي الحمام وترك الببارونه
وصار يشرب حليبه بكاسته
وصرت اجبره يمشي جنبي او يمسك يدي
واذا هرب اكون قويه بس بحنان انه يكون جنبي ماتغافل معاه
المهم قال يااختي مااقدر استقبلكم
قلت عسى ربي يوفقك وانا زميلة مهنه
انا اخصائيه بس ماني قادره اشخص الي بتشخصه انت
ولا شعوريا صرت ابكي
قلت مانمنا من البارح وهذا حيدنا ووو
المهم قال روحي اعملي له تخطيط اذن وتعالي يكون خلصت الي بيدي
قلت ابشررر
ورحت اركض اسوي له تخطيط
لما وصلت التخطيط قال الاستقبال للاسف اختي مضغوطين
قلت الدكتور طالب مننا لو سمحت لاتعقدها ماصدقت ادخل
قال لا يعني لا
قلت اخوي ترى عانيت لين جيت وولدي تعبان لو سمحت
قال لا
شوي طلعت الممرضه وقلت لها ابي اسوي وضروري وحاولت اشرح لها
الله يسهل امرها
قالت تفضلي ودقيقتين وخلصنا
ورحنا للدكتور
وحاولت احشر نفسي ودخلت وقال انتظري شوي
وانتظرت شوي ودخلنا
وسلم على ولدي وولدي سلم
اعطاه حلاو وولدي اخذها وحاول يفكها
جلسته عالكرسي ورفضت انه يقوم
وبدون عربية ابيه يتطور سلوكيا شوي
المهم سالني وعلمته بكامل التفاصيل
قال انا اختبرته واطلاقا مايعاني من توحد
التوحد بالغرب وهو بالشرق
لكن ربما الانتباه عنده مشتت بنسبة واحد بالميه
وربما يكون من قوة ذكائه
اغلب الاذكياء يتوهون
وعدد لي علماء كثيرين يعانون في صغرهم من تشتت الانتباه
وسالني وبالفعل افتركت شغله
لما كنت انشغل وهو صغير كنت اخليه عالتلفزيون
الله لا يحلل هالقنوات الي دمرت عيالنا وانا ماكنت اعرف
المهم قال ابعديه كليا عن التلفزيون
اعطيه وقت اضافي انتي وابوه
طبعا زوجي يسمع كل شي
واايد قرار الفطام من الببارونه
ووودعنا بعد ماهدانا
الحمدلله الحمدلله
دقيت على حضانه رووعه وطلبت منهم اتركه شهر بس
بحكم انه الفصل الدراسي انتهى
قالت الفصل يكلف خمس الاف
ورفضت نهائي
وبحاول اروح لهم واتكلم شخصيا مع مديرتها او الادارة واشرح الوضع لهم
والجمعه القادمه انا وابوه قررنا نعمل له حفله .. ونجمع الاطفال الي بنفس العمر او مقارب لعمره
ساعتين بدون اهاالي ونلعبهم ويكون العدد محدود ست اطفال
ويلعبون ونحتفل بطريقة البيبيات
ارتحت وفرحت واحس هم وراح
باازيد اهتمام واسجله بحضانه وادخله كورسات
وانا متاكده شهر وتعدي هالازمه

حبيت ابشركم تشاركوني فرحتي زي ماشاركتوني حزني البارح