المشاركة الأصلية كتبت بواسطة تحملتك كفاية

شوفي يا اختي

انا اتكلم من واقع انا عشته وان شاء الله تستفيدين من تجربة الطلقة الأولى وطليقتي كيف جابت راسي

حطت صور لعيالي بالواتس اب مافاد معي اشوفهم واحن وانسى

ترسل لاهلي كلموه مافاد معي وقفت كل واحد عند حده وقلت لو ابي انا تحركت بنفسي

كلمني اخوها وقال لي مايكرمهن الا الكريم ولا يهينهن الا اللئيم وزادت المشاكل وقررت اطلق

كلمت امها امي وقالت الى متى بيعلقها اذا علشان المهر نعطيه مهره قررت اطلق بال 3

واخر حركة سوتها اجبرتني اطلق الطلقة الاولى

بعد الطلقة اهلي توقفوا عن التدخل

امها تطبطب عليها وساكته ماتدخلت

اخوها التزم الصمت ماكانه قال كلام زي الزفت وانسحب

وتركوها الحالها تواجه مصيرها مطلقة بطفلين

راح شهر ماكلمتها - راح شهر ثاني حست هي بالخطورة بدأت تتكتك بنفسها كيف ارجعه << وشوفي وش سوت

ماتكلمت على اهلها ليه قلتوا كذا ولا اخوها انت اهنت زوجي ولا شئ من هالامور

كلمت ابوها وقالت كلمه خله يجيب اوراق تطعيم العيال وكلمني وقلت ابشر بكرة اجيبها - هي ماتبي بكرة لانها احتمال تحيض الحيضة الثالثة وتبين بينونة صغرى وماترجع الا بعقد جديد ومهر جديد المهم

قالت لابوها انا ماخذه موعد اليوم لازم يجيبها اليوم - كلمني وقلت ابشر اجيبها بعد المغرب
لما وصلت لبيت اهلها اشهر ماشفت عيالي قبل يطلع ابوها عند الباب مسكته وقالت طلع له عياله يشوفهم حرام مسكين من زمان ماشافهم وهنا الضربة القاضية شافوني العيال الكبير مبسوط ويضحك ويحضني والصغير من الوناسة والشرهه وينك عني يبكي

جابت راسي حضنتهم وابوها سلم علي وقالي الله يخليك لهم يدورونك مشتاقين لك اسأل الله الا يبعدك عنهم

انتهى الموضوع هنا لا كلمت ابوها ودق عليه يجي ياخذ العيال يشوفون اهله مشتاقين لهم وفعلا جيت وعطرتهم بعطرها وعرفته على طول علشان يحن قلبي لليالي الملاح ولا نفع معي راسي يابس

لما حست انه باقي اسبوعين وتحيض الثالثة دعست على كل النصائح الكرامه ولاتهينين نفسك والله مايعزك وبيهينك لانك انتي لحقتي وراه واتصلت علي وكلمتها واعتذرت وندمانه وابي ارجع ونرجع اسره و و و و و وبتغير وماتشوف الا مره تعجبك قلت طيب
ثاني يوم رجعتها على ذمتي

وبعدها بأسبوع رجعت مع عيالي للبيت

لو ابوها ماستقبلني استقبال حلو والله ما ارجعتها

لو ماشفت عيالي وفرحت فيهم والله ما ارجعتها

فنصيحة انا متأكد انها سمعت امها كلام واخوها كلام على تدخلهم بحياتها اول وتكبير المشكلة بس اهلها ومالها غنى عنهم

زيارتين او 3 زيارات ويطيح الحطب

فنصيحتي روحي لأبوك وهو جالس الحاله بالمجلس وسكري الباب وبنتك حطيها بحضنه وقولي له يا ابوي انا بنتك وهذي بنته

وانا غلطانه على ولد الناس مابيه يرجعني ولا ابيك تكلمه يرجعني بس ابيك تستقبله استقبال حلو علشان بنتي اللي بين يدينك مايرضيك تعيش ماتعرف ابوها هو مستحي منك وهذا كلام عمي واضح من اسلوبه انه وده يشوف بنته بس ماله وجه يقابلك

اذا تكلم وهو زعلان وانه سوى كل هالشئ علشانك قولي له انت سويت كل هالشئ علشاني وانا بنتك هو ابيه يسوي هالاشياء علشانها بعد ابي بنتي تتربى وابوها حولها قريب منها ابي علاقته معاك زينه خلاص انا طلعت من حياته مايبيني بسلامته البنت مالها ذنب تكون ضحية

اذا تعودت البنت على ابوها وتضحك له وابوك يضحكها له ويسولف معاه ويقول تحس انك ابوها والله تتحرك مشاعره

اقل شئ اذا مافتح طاري الرجعه ولا يبيك كسبتي انه رجع اب لبنتك وحولها

فلا تركزين على موضوع ابي ارجع لطليقي ركزي على ابي ارجع طليقي لبنته يشوفها ويجلس معها وعلاقته تتحسن مع اهلك لان حلقة الوصل بين بنتك وطليقك هم اهلك

واذا هو له خاطر يرجعك بيفتح الموضوع مع ابوك ويقول نشاور البنت

بعد ما يصير ابوك يكلمه ويقول رجع بنتي بذمتك ومايصير يقوله انت تبيها ولا خلاص عفتها اهم شئ توصله رسالة انه من جهة اهلك طاح الحطب

وتبقى ابو البنت ولك مكانتك

بس انتي لازم تتكلمين مع ابوك سمع منك وانتي جايه زعلانه وسمع منك وقت ماكنتي متضايقه لازم يسمع منك الحين

والله يوفقك ويكتب لك الخير