رد: كوفي شوب الصبايا 2 ( المشاركة للنساء فقط
أشوف الأولاد صاروا يتجنبون الطلعة مع الأهل في سبيل اللعب!
ولد خال زوجي لما أمه ترتب لطلعة ما يرضى يطلع معاهم .. ويقول لها: باروح ألعب مع سلطان!
لدرجة إن الحرمة صارت منحرجة مني وتقول لي: عيزت معاه .. كل ما قلنا بنطلع قال باروح عند سلطان .. وما أقدر أخليه بروحه في البيت لما نطلع كلنا.
وولد جيرانا أمه تقولي له إنه يسوي نفس الشي .. ما يرضى يطلع معاهم ويفضّل يجي يلعب مع سلطان أو يروح يلعب مع عيال خالته.
سلطان حاول يعملها كذا مرة .. بس ما خلّيته.
في لحظات الهدوء أقول له: اليوم المخصص لطلعتنا ما تطوفه عشان أي شي ولا عشان خاطر حد .. وربعك لهم وقتهم تروح لهم وتلعب معاهم مثل ما تبا.
ومرات أعصب عليه وأقول له: لو ما تبا تطلع بكيفك .. لكن ما بتروح تلعب مع حد ولا حد من ربعك بييك البيت.
.
.
.
عجبني فكرة البت الدكتورة فانيتي بخصوص الخروج مع الولد.
صراحة أنا بعد ما خطرت على بالي .. مع إني أسويها مع مهرة حالياً .. ونطلع أحياناً نروح مع بعض السينما ونتغدا وأشتري لها أغراض .. وسبحان الله من كم يوم أكلم أبوهم واقول له: أتريا شما تكبر شوي عشان آخذها معانا وتكون طلعة بناتية.
في المقابل كذا مرة أطلب منه يطلع مع سلطان بروحهم .. سينما أو مول أو أي مكان .... ووجهة نظري إنه ولد والمفروض يلازم أبوه ويتطبع شوي بأطباعه .. لأنه أساساً ما يشوفه وايد .. وأعمام الولد مب متواجدين كثير ولا فاضين له .. وأشوف إن تواجد الأب والأعمام واحتكاك الولد بهم كرجال له تأثير إيجابي على شخصيته .. وهذا شي يفتقده ولدي كثير.
__________________
اللهم طِيبَ الأثر .. وحُسْنَ الرحيل.
التعديل الأخير تم بواسطة مهره ; 30-05-2015 الساعة 09:16 PM