اقتباس:
المشاركة الأصلية كتبت بواسطة مهره
إشراقة..
أمس تحديداً حصل حوار بيني وبين زوجي بخصوص الولد .. وقبلها حوار قبل حوالي أسبوعين أو ثلاثة.
الولد وحيد .. أبوه يغيب لأوقات طويلة .. أعمامه مب متبرضين له .. والاثنين اللي في البيت عزوبية وما يتفهمون أصلاً حاجة الولد لرجل في حياته ويومه .... وأنا كحرمة ما أقدر أزرع فيه كل اللي تحتاجه شخصيته كرجل.
من أسبوعين طلع مع ولد خاله وولد الجيران .. راحوا النادي يلعبون كرة قدم.
لما رجع قال لي: ما لعبت وايد!
قلت له: ليش؟
قال: حطوني في الاحتياط!
قلت له: وفلان وفلان؟
قال: لعبوا المباراة وأنا تميت يالس!
عورني قلبي على ولدي .. حسيت إنهم مستضعفينه .. هم لعبوا وانبسطوا وهو يالس يطالعهم!!
ومواقف سابقة كان يقولها لي تدل على إنه ما يقدر ياخذ حقه بنفسه .. أو إن اللعب يكون على مزاجهم هم على حساب مزاج ورغبة ولدي .. يعني مثلاً ممكن يكون هو يبا يلعب كرة لكن ربيعه يبا يلعب بالآي باد .. فولدي يخضع لراي ربيعه ويلعب بالآي باد مع إنه من داخله ما يكون مقتنع لا يبا الآي باد في هالوقت.
مع إني دايماً وبعد كل موقف أفهمه التصرف الصح وإن من حقك تطالب بحقك .. وتسوي الشي اللي يريحك إنت مب اللي يريح غيرك بس .. على الأقل مرة لك ومرة له .. ولا تخلي حد يجبرك على شي إنت ما تباه.
تكلمت أمس مع أبوه وقلت له لازم تتصرف وتتواجد بشكل أعمق في حياة الولد .. مب معقول يكون دورك مقتصر على إنك توفر له مصروف وتشتري له أغراض .. وربع ساعة تلعبون فيها مصارعة مع بعض آخر اليوم!
طمّني وقال لي: لا تشيلين هم ولا تهوجسين .. الولد بعده صغير .. وأنا أشوفه يتصرف بطريقة زينة لما يطلع معاي المسجد مثلاً.
قلت له: المهم إن الولد محتاج منك أكثر من اللي يحصله الحين.
ووعدني خير.
|
ياحياتي على سلطان ❤ جد فاهمة شعورك.
يبغى لك تبقي ورا أبوه دايماً وتحرصي فعلا يقضي معه وقت.
شوفيني 5 أيام بس وحسيت بفرق كبير!
حتى أنا هدأت نفسيتي وارتحت إنه قريب منه.
الرجال دايماً يحسوا الأم تبالغ وتسوي دراما، وهي أعرف وحدة بنفسية ولدها.
أنا كم مرة أمر على مدرسة ولدي وقت البريك، وأستغرب مرة لما ألاقيه جالس لحاله على الطرف بس يتفرج، وأصحابه كلهم يلعبوا قدامه..
مع إنه في البيت يسوي إنه قوي بس قدام أصحابه ينعزل.
.............
ميمي حبيبتي
ماينفع تكسري كلمة الأبو قدام الأولاد مهما أخطأ.
زوجي يرفع ضغطي في اوقات كثيرة مع الأولاد بس أقصى شي أسويه وقتها أشر له بعيني
