المشكلة ان تامر مانعني نهائي ان حد من اهلي يعمللي حاجة واما اقوله طب اعمل يقولي يومين كده وتعدي الايام ويفضل يأجل كل حاجة بيقولي متصغرنيش امام اهلك هو انا مش قادر يعني اكفي طلباتك اقوله طيب انا اعمل ايه يقولي اصبري انا من بكرة هبدأ واعمل جدولي ويبدأ فعلا بس اسبوع ويكسل يوم وتاني يوم والكسل يبقي اسبوع ويرجع يبدأ من جديد الل غايظني انه فاضي ودايما قاعد في البيت انا بس مستنية ماما تيجي من السفر. ونقعد نتفق علي كل حاجة وبعدها مش هيبقي في تهاون
انا ما اقدرش انكر سلبيتي واني فعلا مش قادرة اعمل حاجة بس غصب عني انا جوايا احباط شديد بقول لنفسي حتي لو عملت هكسب ايه وخاصة ان اللي بايدي اعمله حاجات محدودة وكلها في البيت زي اهتمامي ببيتي وبنفسي فقط لان تامر والله مقيد حريتي تماما نادرا لو سابني اخرج او هو خرجني والخروج بالنسبالي والشغل هو الحياة لكن لو قمت واتحركت واهتميت بالبيت هفضل برده قاعدة زي ما انا لحد ما هو يتغير وده اللي بيحبطني ومخليني لاقية حجة لنفسي عشان اكسل انا والله تعبانة من وضعي جدا واتخنقت من حياتي فوق الخيال
وغالب الحاجات اللي بقول لحضرتك بعملها باخدها من كلام حضرتك ليا ونصايحك ليا لاني فعلا عاجزة عن التفكير ولا عارفة انا عايزة ايه ولا ابدأ منين جزاك الله كل خير
وبإذن. الله هستغل فرصة شهر رمضان بإن الحال يبقي افضل. وهعمل بنصايح حضرتك وربنا يقدرني
ربنا يكرمك ويسعدك دنيا واخرة

__________________
لا حول ولا قوة إلا بالله العلي العظيم