رمضان كريم للجميع
من كم يوم كنت عم حدث زوجي عن ذكريات الطفولة ومن ضمنها شهر رمضان
بعتقد من اجمل الذكريات انا وصغيرة بشهر رمضان ومهما اجت سنين وسنين ما بعتقد حس بنفس روعة الايام اللي عشتها
اول ما بلشت صوم كنت بعمر ال7سنين او 8وكنا ساكنين فوق بيت جدي وعمتي من نفس عمري وعمتي التانية اكبر مننا بتلات سنوات
وكانوا بيت جدي ساكنين بدار وبنفس الدار في بيت عم بابا وبيت لجدو لبابا وبيت لعم بابا التاني وعندهم اولاد باعمارنا
كنا ننطر المسحر يجي ومعو الطبل وخاصة بس ينادي لكل بيت باسمه وكنت الوحيدة اللي ماما تفيقني عالسحور لاني الكبيرة كنت حس كل شي غير
وبالنهار كان يقرأ بابا قرآن وانا اقعد جنبه وردد وراه
كنت حس اني صرت صبية
وبالنهار كنا نتجمع كل الاولاد الموجودين بالدار وننطر الاذان كلنا مع بعض
وكنا نحضر مسلسل لبناني اسمه ابو سليم وكانت حلقاته من وحي اجواء شهر رمضان
بتذكر وقت كنا ننسى انو صايمين وناكل ونضل نتمخمض بالماي كرمال ما نفطر
كنت ما بعرف كتير بالوقت انو الدقيقة ستين ثانية
وكنت اسأل بابا او احد عمومتي ئديش بعد في للافطار وبس يقولولي بقي 5دقائق كنت عد انا وعمتي والاولاد للخمسة وننطر وما يقول الله اكبر
ونحس الوقت صار طويل وما عم يخلصوا الخمس دقايق
كنا نلعب تنس كتير بشهر رمضان اوقات العصر
كانت شوارع الحي ملانة اشخاص كبار وصغار بيلعبوا تنس ليمر الوقت
وكنا نحضر فوازير رمضان ننطرها واخرها في حزورة
ونصير نتحذر ونسأل الكبار عنها
بتذكر وقت كان يجي جيران بيت جدي بعد الافطار ليسهروا عندهن كان يقول جارنا انهن بعدهن صايمين وهني عم يمزحوا بس انا كنت صدقهن وقول يا الله كيف بعدهن بلا اكل لهالوقت وكنت معجبة بقوة تحملهن
كنت ضل روح شم ريحة الاكل انا وعمتي وتضل جدتي تشوفنا كيف حايمين حول الطنجرة او صينية الحلويات ههههههههه
كانت اجواء بسيطة وبالرغم من بساطتها كانت روعة
يا ريت بيرجع الزمن القديم وبترجع المحبة والبساطة والعفوية بين الناس
كان كل شي غير
ما عندي ذكريات حزينة خلال سنين اشهر رمضان انا وصغيرة
بالعكس كانت من اروع ايام حياتي
الحمدلله والشكر لله من قبل ومن بعد
وفي ذكريات كتير
احترامي

__________________





اللهم إني أستودعك ديني و نفسي وأهلي وزوجي
وأولادي وأحبتي فاحفظهم يا من لا تضيع ودائعه