مبدئيا امامك طريقين
الاول تكسبي حماتك. والثاني تتجاهليها. لان طريق المشاكل مش هيجيب غير المشاكل
تكسبي حماتك ياريت تحاولي تعملي ده هو اكيد مش سها عليكي بس لو حطيتي الهدف في دماغك هتوصليله وخاصة ان ده هيقربك من زوجك جدا وده تعمليه بإنك تعامليها كويس تستشيريها في كل حاجة عملت الاكلة دي ازاي ؟ اعمل في ده ايه؟ حسسيها انها مامتك وماتخليهاش تغير من علاقتك بابنها وخليكي زي الملايكة معاها مهما حصل ولو اتضايقتي زي ما قلتلك قبل كده اشغلي نفسك في اي حاجة اشربي ميا اعملي اي حاجة واهربي من النقاش الحاد معاها الهدايا طبعا وانتي خارجة اساليها اجيبلك معايا ايه دايما ادعيلها واشكري فيها امام زوجك واوعي تذكري عيب فيها لزوجك ابدا وحسسيها ان ابنها غالي عليكي اساليها بيحب ايه وامدحي في تربيتها ليه وقوليلها انه بيحبها اوي وساعديها ( قال الله تعالي ({ ادفع بالتي هي احسن فاذا الذي بينك وبينه عداوة كانه ولي حميم}
عن ابي الدرداء قال رسول الله صلي الله عليه وسلم ,( اثقل شيئ في ميزان المؤمن خلق حسن , ان الله يبغض الفاحش البذئ) صحيح الجامع
طبعا انتي عارفة المعاملة الحسنة اد ايه بتغير قلوب الناس ومش محتاجة اقولك بس لو ركزتي علي الهدف ده هتوصليله
الطريق الثاني التجاهل وده لازم يتم بذكاء ومعاملة حسنة تخليكي سوسة كده وتحاولي تعرفي شخصيتك حماتك وتتعاملي معاها ازاي بحيث متجيبيش لنفسك مشاكل وتريحي دماغك وفي نفس الوقت تحيريها معاكي وتبقي غامضة وتعملي لنفسك قيمة كبيرة بينهم وطبعا ده محتاح كيد ووعي كبير وتخطيط بحيث محدش يمسك عليكي غلطة مثلا في واحدة بيتها لازق في بيت حماتها وحماتها قوية ومش بتسكت علي حاجة معاها ومع سلفتها لكن لو ولادها موجودين تعامل زوجاتهم احسن معاملة فقررت الزوجة تبقي ذكية ركزت مع حماتها وحاولت تتجاهل المشاكل وتعاملها كويس وحماتها قالت انا ولادي كلهم خدامين لزوجاتهم صحبتنا استغلت الكلمة لانها عارفة انها هتضايق زوجها راحت قالتله بس مش مباشرة فتحت موضوع معاه وقعدت تتكلم عادي لحد ماجت الفرصة انها تقول لجوزها مامتك قالت انكو كذا بس بهزار وذكاء وهو اتضايق. عرفت تهديه وتقوله خلاص مش لازم كل حاجة بتعملهالي او بنعملها تروح تقولها وحتي كمان عشان هي ماتزعلش وجابتها انها خايفة علي زعل امه وزعله ومابقاش بيعرف مامته كل حاجة انا بحكيلك القصة دي عشان تعرفي ازاي الست تستخدم ذكائها من مواقف وحاجات عادية ممكن متخديش بالك منها تقدري توصلي لحاجات عايزاها انا قلتلك قبل كده تتجاهلي مشاكلهم ازاي وتدلعي نفسك وتحيريهم في امرك خليكي غامضة مهما حاول حد يستفزك تعالي علي نفسك وهتتعودي ويبقي اسههل من ما تتخيلي ومع تجاهلك ابدأي واحدة واحدة كل كام يوم قولي كلمة شكر لزوجك علي مامته لحد بس ما يتأقلم ع الوضع الجديد حاجات. بسيطة كل فترة وزودي مع مرور الوقت
بالنسبة للمواضيع انا لقيتلك كتير مواضيع حلوة بس بيتهيالي مش هينفع اكتب الرابط هي مواضيع عن ذكاء الانثي في التعامل مع حماتها اكتبي في جوجل. ازاي تتعاملي مع حماتك المستبدة.
بس في كل الحالات تبقي طيبة وحنينة ووديعة اه لكن تتنازلي عن حقك لالالالالالا والف لا وكله بالادب والمعاملة الطيبة الحسنة خليكي فعلا بكل ما تعني الكلمة اميرة بمملكتك

__________________
لا حول ولا قوة إلا بالله العلي العظيم