مبتعثة

اقول لك مواقفها في كل ولاداتي .. يمكن تعرفي انت الإجابة ؟؟

و خلي الي يدافعوا عن حماتي ..
يحطوا نفسهم مكاني .. و يعرفوا هل تصرفاتها راقية !؟

.
.

- اول مرة اسلبت ببداية زواجي .. كنت بين الحياء و الموت ..
و حماتي قالت لزوجي و هي تعرف اني تاني يوم رايحة المستشفى و نفسيتي تعبانة و امي خايفة علي ..
قالت له جيب مرتك عندي تخدمني في الشغلة الفلانية .. زوجي قالها تعبانة مرتي و موعدها بكرة عشان
الإجهاض .. و قالها زوجتي تبكي ..

قامت طنشته .. تاني يوم جاتني الصبح في بيت اهلي و انا نايمة و دقت الجرس بدون حياء

امي فتحت الباب و تفاجأت بحماتي .. تقول لامي نادي بنتك عشان ابغاها تساعدني بشغلة معينة
امي ما صحتني و انقهرت و مسكت حالها عشان حماتي في بيتها و عيب تطردها

دخلتها و قالت لها بنتي تعبانة و نايمة و طبعا امي كان وجهها مقلوب و ما أعطت لحماتي وجه
و كشرت بوجه حماتي و كلمتها برسمية .. و رجعت بيتها ..

و صارت تحسب حساب لامي بعد كذا .. كانت تحسب امي طيبة و ضعيفة و مسكينة ..

و لما جاء موعد الإجهاض ؛ كان زوجي معايا و ما تركني و عرفت بعدين انه اهله خاصموه ..
انت خروف و ليه جالس معاها بالمستشفى و اتركها لوحدها و انت تيس و ماعرف ايش !؟
و ليش مستشفى خاص و مو حكومي !؟

.
.

- جبت طفلي الاول .. و باركوا لي أخواته بالجوال ..
لكن أمه و ابوه ( لا )

و انا خارجة من المستشفى و رايحة بيت اهلي .. تاني يوم رحت أطعم ولدي
و نحن راجعين ؛ زوجي ضحك علي و خلاني اخد الولد و اوريه لامه و انا توي والدة
و حطت 100 ريال او 50 و ماني فاكرة بالضبط ..

لكن اكتشفت بعدين انه يشوفوه تقليل من شان الام و الأب .. انهم يتصلوا على زوجة الابن
و يتحمدوا على سلامتها و هي الي لازم تاخد النونو و توريه لهم و تكسب رضاهم عليها

.
.

- جبت طفلي الثاني .. و كنت الفترة هذيك انا الي مقاطعتهم .. لانه زادت مضايقاتهم و اذيتهم لي

و انا امي مريضة و ما بين الحياء و الموت ..
و كانت تحس بيا اذا تضايقت و تضايق و تبكي من ورايا و تقول ( بنتي رميتها لناس ما يخافوا الله ) ..

فما كنت حابة أزعجها بمشاكل اهل زوجي .. و امي مو ناقصها و ماني فاضية لهم و لمشاكلهم ..
و مابغى امي تحس بالندم و تلوم نفسها و تموت بحسرة على بنتها ..

و لما جبت النونو وقتها .. اهل زوجي و بأمر من ابو زوجي .. ارسلوا لي - مرقة لحم و سلطة - ..
الغريبة انه هذا بفترة المقاطعة .. !!!!؟؟؟

.
.

- ولدي الكبير مرة دخل غرفة العمليات و تنوم بنج كامل ..
انا و امي نفسيتنا تعبانة وقتها ..
و ام زوجي جات و تبيع بضاعتها بالمستشفى على الممرضات و ما كأنه حفيدها في وضع خطر
و ام زوجي و ابوه .. قالوا لزوجي مو لازم تروح المستشفى و ضرس زوجي يوجعه ..

و دقيت على زوجي وقتها و تزاعلت معاه و قلت له تجي حتى لو كنت على فراش الموت و بتنازع ..
هذا ولدك الوحيد و بين الحياء و الموت .. و ما تتركني لوحدي

.
.

- اما الأخير لما جبته .. كانت علاقتنا خلاص رجعت ..
و ما كان فيه شي بيننا .. و تحسنت العلاقات ..

و ما اتصلت أمه و لا حتى ابوه ..

و يبغوني انا اخد النونو و اروح لهم و اوري لهم النونو ..
و مايصير ينزلوا من مقامهم .. و انا مرة الولد !!!!

طنشتهم و لا سألوا عنه .. و لا سالت عنهم ..
اخوات زوجي عرفوا اني ولدت بعد أسبوعين و لما زوجي عاتبهم

قالوا ما كان عندنا خبر ...

.
.

لقيتي تفسير لتصرفاتهم !؟