من قبل كم يوم ، تكلمت مع زوجي .. كلام سريع ..
اقترحت عليه انه نعدي على أهله و نسلم عليهم ..

لإنهم ما شافوا الأولاد من بعد العيد ، زوجي رفض مثل كل مرة ..
و قالي ( مو لازم ) ..
قلت له ( من زمان ما راحوا .. لو في الشهر مرة يروحوا ، أو في الشهرين مرة ..
يعني 6 مرات في السنة ؟ )
جلس ينكت و يقول ( لو مرة وحدة في السنة .. كفاية )

استغربت الصراحة منه !
لكن بعدين اقتنعت بكلامه ..

قالي الصراحة ، أمس أمي كلمتني و قالت من زمان ما جبت أولادك ، ليه ما تجيبهم ؟
و قام اخدنا زوجي و رحنا لهم زيارة سريعة ..

.
.

- سلامهم كان بارد ، خالي من المشاعر ..
حتى مافي لا حضن و لا بوسة لأحفادهم .. بس شافوهم من بعيد و بس ..

- أنا طبعي أحضن أولادي و أبوسهم و ألعب معاهم ، و حتى مع أطفال أهل زوجي ..
و حماتي احسها تراقبني من بعيد لما أجلس اتكلم مع الأطفال و اخد و أعطي معاهم ..

- هما يراقبوا الأطفال عشان ينتقدوهم ، يبحثوا عن أي غلط فيهم و يعاقبوهم عليه ..
حسيتها تراقب اولادي و تدور عن أي شي .. و ولدي الوسطاني ، بالغلط مسك شي من باب الفضول ..
و على طووووول صاحت ، أنا انفجعت و رجعت الشي مكانه و شفت ولدي انفجع ..
( قلت له .. لا حبيبي ، لا تمسكه ) و ابتسمت له .. و ولدي فهم خلاص ..
هما يبغوني مباشرة اضربه ..

- الصغير جاء عندي و جلس في حضني ، و بسته و حضنته .. شفت أمه تطالعنا و ساكتة ..
قلت لها بحسن نية ، ما يخلي أحد يقرب مني ، لا أبوه و لا أخوانه .. يبغى بس كذا يكون جالس ..

- بدأت ابتساماتها تنقلب للون الأصفر ..

.
.

فهمت بعدين ليش زوجي ما يحب ياخد الأولاد عندهم ..
لإنهم يبدأوا ينتقدوا زوجي في كل شي يختص بالأولاد ..

و زوجي لإنه غير واثق في نفسه ( و إن كان الآن أفضل من قبل ) ..
فيرتبك ، و يجلس يهزئ في الأولاد أو يعاقبهم على اي شي .. و يعصب على الأولاد ..

أنا قدامي ما يقدروا ينتقدوا أولادي .. شايفيني كيف اهتم بالأولاد ..
و عيني عليهم طول الوقت ، و ما أعطي فرصة لأي أحد انه ينتقد أولادي ..

.
.

تويي اللي افهم و اكتشف الشي هذا ..

عشان كذا ، ما راح أقرب أولادي مرة كثير و لا ابعدهم ..
إذا أبوهم بياخدهم عندهم ، بكيفه ..

حتى سلفتي تقول لي ، إنه أهل زوجي دايما كانوا يضربوا أولادها و ينتقدوهم و يعاقبوهم و يهزأوهم ..
و يقولوا نحن ( عماتهم و أعمامهم و نربيهم على كيفنا ) ..
و قالت لي سلفتي اللي عاشت معاهم ، إنه أهله يحسبوا حساب لأولادي و ما يقدروا يخاصموهم ..
تقول يخافوا يخاصموا أولادك أو يزعلوهم ..

.
.

خلاص خلينا كذا أفضل ..

المشكلة ، أسلوبهم في التربية غلط ..
و ماني مستعدة أخلي أولادي ضحايا لهم ، يكفي زوجي كان ضحية لتربيتهم ..