اليوم عندنا دورة تدريبية في مركز تدريب مشترك
وطالعة الدرج للدور الثالث
وأسمع معلمه تعنف طالبة والبنت تبكي والمعلمة مستمرة
وقفت اسمع ، والمح مدربة نازلة بسرعة ووجهها مخطوف
وصلت قاعتي وأشوف المعلمة مع الطالبة والمعلمة بمنتهى القسوة
شوي وصلت المدربة ، وحاولت تفك الطالبة من المعلمة ( الطالبة اولى يعني ست سنوات)
والمعلمة مستمرة بالصراخ وتقول للمدربة أنت وش دخلك ...... الخ
كنت متفرجة من فوق ونفسي أصور لكن أدري إنه ما يحق لي
لكن بكيت وبكيت وبكيت
دخلنا المحاضرة وتناقشت مدربتنا معانا في الموضوع
جا وقت الاستراحة
وألمح وأنا طالعة أم البنت جايه وماخذه بنتها
رحت قسم الابتدائي ولقيت الفاصل بيننا وبينهم مقفول من عندنا بس
دخلت عليهم ورحت للطالبة وسلمت عليها وكلمتها
لمحتني أمها مع وحدة ثانية وهي جالسة تنتظر معلمة بنتها
فنادت بنتها
قلت لها انتبهي لبنتك
سألتني المعلمة" المجرمة" من أنت؟!"
قلت لها مالك دخل وطلعت
التفت على الام وانت طالعة الدرج وقلت خذي حق بنتك وأنا مستعدة أشهد
تدخلت المعلمة رديت عليها بأنها ما تخاف من الله و..... الخ
قالت أنا ماني خايفه منك وأنت اللي ما تخافين من الله
واستريلت أنا ما ضربت البنت ولا عنفتها
قلت لها العنف مو جسدي بس العنف ممكن يكون لفظي وهذا اللي سويتيه
وأنت ما تستحقين تكونين مربية
وطالت السالفة وصارت هوشه
وبرددددررررت كبدي فيها
اخذوني بعض المعلمات
ورحما غرفة المشرفة
وقلت لها وينك أنت وش دورك؟!
الكل باين عليه الخوف ويبون يلمون السالفة
اسخف ما قالوه لي إن البنت متعبتهم من أسبوع لدرجة أمها تجي معها الصبح وتضربها كفين وتمشي؟!!!
هل هذا مبرر لكم تعنفونها وتسحبونها من الارض؟!!
في النهاية تدخلت معلمة لفك التجمهر وقالت أنت مالك علاقة ، ووشلون دخلتي لهنا مالك حق تدخلين
المواقف الإنسانية ما فيها مالي علاقة ، إلا لي دخل
مصرة إن مالي دخل وإني تدخلت
قلت لها أنا أوريك وشلون مالي دخل ؟!

البنت تخيلوها بنتكم قبل لا تردون علي
وعطوني وش ممكن تسوون ؟!

__________________
.
هناك من يتذمر لأن للورد شوكاً، و هناك من يتفاءل لأن مع الورد شوك.