رد: كوفي شوب الصبايا (3)
أمس يومنا كان طويل ومرهق نوعاً ما.
كنا متفقين نطلع نعمل مشاوير بعد ما أوصّل شما الحضانة.
رجعت البيت لقيته مجهّز لي ريوقي.
رحنا الجمعية خذنا أغراض البيت .. وعقب لفينا على كذا محل أثاث عشان بنجدد شي في البيت.
خلصنا ورحنا خذنا شما ورجعنا البيت.
دخل المطبخ عمل بيتزا للغدا.
والعصر طلع يودّي سيارتي السيرفس .. وتأخر لأن العامل غلط غلطة في السيارة وكان لازم يصلحها.
المغرب بعثت له مسج حلو تقديراً لتعبه ومجهوده.
ورجع عقب ما أذن العشا.
كان جداً تعبان ومرهق .. وريله تعوره لأنه واقف عليها من أول اليوم .. وشرب غرشة الماي كلها.
دخل يتسبح .. وأنا يلست أجلّد كتب سلطان.
طلع من الحمام على طول مسك موبايله .. مع العلم إن طول اليوم وهو كل شوي ماسكه.
طالعته مرتين وأنا أجلّد .. وتميت ساكتة .. ومع سكوتي بان إني تضايقت.
طالعته مرة ثالثة لقيته يطالعني بنظرة كلها حنان!!!!!!!!!!!
وقام من مكانه ويا يلس حذالي .. وعقب انسدح وخشّ راسه ورا ظهري ولف ذراعه حوالين خصري .. وقام يسولف مغاي ويحكي لي عن سالفة قراها في تويتر (إيحاء إنه كان فاتح تويتر ويقرا) .. وسوالف ثانية.
وأنا أدري إنه كان عالواتس لأنه كان يستقبل كذا مرة .. وكان يكتب.
تميت أسمعه وأحاول أتجاوب معاه في سوالفه ومزحه .. وأنا أبكي من داخلي!!!
هو يسولف وأنا أذكّر نفسي باللي سواه لي طول اليوم .. هو يمزح وأنا أذكّر نفسي بأنه أحسن من غيره .. غيره رامي حرمته ولا مفتكر فيها زعلت والا رضت .. وهو يداريني ويحتويني.
نمنا وقمنا الفجر وهو لا يزال يداريني حتى هذه اللحظة.
مقدرة جهده .. بس متعبة الحياة بهالشكل.
أعوذ بالله من الشيطان الرجيم.
المهم .. ما أعتقد إن في حد أقدم مني في المنتدى .. إلا أبوفيصل. 
__________________
اللهم طِيبَ الأثر .. وحُسْنَ الرحيل.
التعديل الأخير تم بواسطة مهره ; 09-09-2015 الساعة 09:47 AM