في البداية يا بسمة اقولك الله يصبرك و يربط على قلبك و يعينك على الحالة اللي انتي فيها

الوحدة لما تشك بزوجها او تكتشفه مره مستحيل ترجع ثقتها فيه مره ثانية ورح تعيش بداومة الشك خصوصا اذا كانت تصرفات زوجها مريبة فعلا

انا اكلمك من واقع تجربة مريت فيها .. اذا زوجك انتي متأكدة مية بالمية انه خاين وان الخيانة وصلت فيه لعلاقة محرمة وطلعات لا قدر الله وما اقتصرت على تعارف ومكالمات فهو مستحيل يتعدل
اذا الموضوع كان مجرد مكالمات ورسايل عطيه فرصة اخيرة
الفرصة الاخيرة مو انك تحرقين قلبه وتخونينه مثل ما احرق قلبك (وصدقيني والله العظيم اني حاسه فيك ومريت بهالشعور قبل ) بس الحمدلله لولا لطف الله فيني والوازع الديني اللي بداخلي ولا كنت انجرفت ورا هالوساوس المريضة
الفرصة الاخيرة حبيبتي انك تحسسينه كيف بتكون حياته نااقصة اذا انتي انشغلتي بحياتك عنه وما فكرتي فيه ولا فتشتي وراه
خليك دايما مبسوطة وسعيدة ومبتسمة (حتى لو كان مجرد تمثيل ) انشغلي بهواياتك حسسيه انك فجأة رجعتي انسانة متفائلة تحب الحياة ولا توضحين له سبب
خلي كلامك معاه جدا عادي ولا تعطينه الاهتمام اللي كنتي تعطينه اياه قبل
اطلعي لاهلك او صاحباتك واذا رجعتي خليه يتعجب من ابتسامتك و سعادتك
حسسيه انك عايشة حياتك طول بعرض وانه وعلاقاته اجزاء ما تشكل اهمية بحياتك الحين
حاولي بين فترة وفترة وبشكل عادي في السوالف تقولين له انا الحياة علمتني انها ما توقف عند احد وان الشي اذا انكسر مستحيل يرجع مثل ما كان واذا قال لك وش تقصدين قولي سلامتك يا عمري ما اقصد شي

وخلي الاسئلة اللي جواه تحرقه و تكونين انتي اللي دايما شاغلة باله وتفكيره و كيف يرجعك مثل ما كنتي وكيف يحسسك مره ثانية بالامان والثقة
هذا الحل الأول اذا كان زوجك من النوع اللي ممكن يتقبل الحركات هاذي ويحب المرأه المستقلة اللي هو يحاول يكسبها مو هي اللي تكون ميتة على رضاه

اما اذا زوجك مو من هالنوع فانا قريت من قبل طريقة ثانية للتعامل مع الخاين ..

اقتليه بالاحساس بالذنب واحرقيه بتأنيب الضمير

بمعنى انه اذا حط راسه ع الوسادة بينام وهو خلال اليوم كان خاينك ولو بنظرة خليه يقول والله هالانسانة ما تستاهل اللي قاعد اسويه فيها .. والله اني ما عرفت قدرها ولا استاهلها بدل ما يقول نامت وآخر شي سمعت منها هواش وصراخ انا اصلا احس بنقص عشان كذا كلمت فلانة او راسلت فلانة ويجلس يبرر لنفسه لان هاذي هي عقلية الرجل الخائن من اكبر الدوافع اللي تشجعه على الاستمرار في الوضع اللي هو فيه هي المبررات اللي يخلقها لنفسه وانه هو المظلوم المسكين وانك السبب في خيانته

كوني له زوجة مثاالية لفترة لو تمثيل واحتسبي أجرك عند الله تعالى واشبعي حاجاته من جميع النواحي وخليك الانسانة اللي اي رجل يتمناها زوجة له ولا عاد تطلبين منه يتغير ولا تفتحين معه مواضيع الماضي وشوفي كيف تأنيب الضمير اللي يقتله ببطء قاعد يغيره للأفضل بدون ما يحس


ارجع واقول الله يكون بعونك وهالشي متعب ورح تطولين وانتي حتى بعد ما يتغير رح يظل عندك شوية شكوك حاولي ما تلقين لها بال

واذا ما تعدل بعد الفرصة الاخيرة اللي رح تعطينها اياه بيكون الانفصال احد الحلول لانك رح تكونين متأكده ان الخيانة فيه طبع مستحيل يتغير فاذا كنتي مو مستعدة تعيشين حياتك معاه بهالاسلوب الطلاق بيكون الحل الاخير

واخر نصيحة اذا كان لسى ما عندك اطفال شيلي فكرة الحمل من بالك لحد ما تستقر اوضاعك وتعرفين حياتك معاه كيف بتكون ورح تستمر او لا