رد: علاقة عاطفية / حسن السجايا و مثابر
اللهم لك الحمد كما ينبغي لجلال وجهك و عظيم سلطانك
الحمدلله و الشكر لك يا الله
احس نفسيتي مستقرة جداً الحين
و تأهلني اني أتكلم عن مستجداتي ( القوية ) اليوم
..
تواصلت مع الوالدة بخصوص الخاطب
و كنت احس بحزن خفي .. و احباط
و صراع بين اني أحرجت ابوي بهالموقف او او
قالت انا تواصلت مع أبوك و قلت له يكلمه
بس ما رد علي
حسيت ب ضيق شديد
خلاص وصلت لمرحلة أبغى اعرف ايش النهاية
و بنفس الوقت فيني قلق و خوف شديد من النهاية
كلما له يتعاظم و احس بانقباض بقلبي
رجعت تواصلت مع أمي مرة ثانية
و انا طفشااااانة خلاص ..
سألتها ايش صار
قالت أبوك ما كلمك
قلت لها دقيت عليه و ما رد
قالت ارجعي دقي الحين ..
قلت لا لا استحي انتي كلميه و أساليه و قولي لي
شوي كلمتني
قالت يقول انه كلمه
و انه بيقول لي رده بعد شوي لانه معزوم و عند رجال
قلت لآمي : طيب تخيلي يقول الشاب صرفنا نظر
أمي سكتت ..
بعدين فجأة قالت : ترا ع فكرة هذي الكلمة اللي قالها لأبوك
ضحكت قلت يلا الحمدلله انا أحسن من غيري
غيري ظلت مخطوبة و معلقة سنة بعدين اكتشفت انه الولد عقد على غيرها
سكتت و صرت أردد بصوت منخفض انا لله و انا اليه راجعون
اللهم اجرني في مصيبتي
لاحول ولا قوة الا بالله
استأذنت من أمي ..
و تركتها !
فرشت سجادتي بصلي
و احس الدنيا تدور فيني و كلها ظلام في ظلام
حسيت جاتني فجيعة و صدمة قوية
توني استوعبها لما صرت لحالي
صرت ابكي و اشااااهق بصوت عالي
عيوني مثل الجمر من الدموع
صرت اصلي و ادعي يا ارحم الراحمين
انا انكسرت اجبر كسر قلبي
يا ارحم الراحمين
يا أرحم الراحمين
يا ارحم الراحمين
بعدها حاسة أبغى أتكلم
احس ب صدمة
بس ابكي و بصوت عالي
تواصلت مع أختي بكلمها
و ما قدرت أقول حرف بس أصيح .. احس مفجوعة
ارجف من الصدمة
و أختي تهديني
تقول لي ايش تفكرين فيه ؟
قلت لها لو اقولك أفكاري .. مؤلممممة
والله ما اقدر أصرح فيها
( انا طبعي كتومة .. مهما عرفوا الناس مثلا أين منزعجة او ابكي
ممكن يعرفون الحالة الشعورية العامة فقط و غالبا اوضحها
لكن الأسباب مقدر أتكلم فيها
حتى هنا بالمنتدى غالبا أعجز عن كتابة ما فيني )
قالت حاولي ..
قلت كل الشباب الرائعين اللي مروا بحياتي
خسارتهم و راحوا لغيري
قالت استهدي بالله
و و
ما قدرت اكمل معها ..
رجعت أتواصل مع أمي بعد ما هديت شوي
لكن اول ما سألتني : شفيك ؟؟
صرت ابكي بصمت
قلت لها والله ماني مجروحة
بس مصدومة
تعرفين اللي تأملت
بس الحمدلله الواحد يتعلم من أخطائه
انا ماعاد بأمل نفسي ابدا
بحط في بالي انه الموضوع ممكن يتم و ممكن لا
مع اني كنت قبل بكل خطوباتي هذا توجهي الفكري
بس مدري ليش هالمرة شطحت
و أمي هدتني كثير بكلامها
تكلمنا قرابة الساعتين
بس كلامها كان جداً مريح و كله امل و تفاؤل
اللي فاجئني ان الوالد و الوالدة
يدرون ان الشاب صرف نظر من فترة طويلة
بس حاولوا ما يقولون لي خايفين علي لا اتاثر
او تتأثر دراستي بالذات و انا بعيدة
و حاولوا يأجلون اخباري أطول فترة ممكنة
بيشوفون بنسى ولا لا
أمي تقول لما شفناك مصرة تعرفين راي الشاب
قلنا بنعلمك بعد العيد ما نبي شي يجرحك بفترة العيد حرام
تقول و شلنا هم انا و أبوك مين بيبلغك
و كل واحد فينا خايف و يتهرب هههه
قالت شفتي صدمتك بالرفض
سبحان الله احنا أمك و أبوك عشناها
تقول انا تأثرت و ما نمت هذيك الليلة و لا أبوك
و لا حتى قدرنا نفتح الموضوع مع بعض
ما نعرف ايش نعبر او نقول
كنا مثلك مرتاحين للناس و للشاب و متوقعين كل شي يتم
فلما شفنا صدمتنا خفنا على شعورك اكثر
بما انك انتي الطرف الرئيسي
يا الله وهي توصف لي مشاعرهم
تعجبت من رحمة الله اللي زرعها بآلام و الأب
و كيف الرحمة اللي استودعها فيهم تجاه أبنائهم
أمي كان كلامها كله تفاؤل و امل و حسن ظن بالله
ريحني كثير ..
انا حقيقة اقدر اقول اني تجاوزت الموضوع تماماً
لآني أول شي مريت بمرحلة نكران
بعدين صدمة
بعدين انهيار و حزن و احباط
بعدين استسلام
بعدين منطق و رضا بالقضاء و القدر
و كلها بفضل الله ثم بفضل أهلي و وجودهم حولي
الحين احس بطمأنينة و راحة
بعد يوم حافل بالانفعالات ههههه
للحين املي يفوق ألمي ..
و راح استمر بالاستغفار بإذن الله
( من لزم الاستغفار جعل له من كل ضيق مخرجا )