المشاركة الأصلية كتبت بواسطة mimomea

عزيزتي رينول مش ضروري تكون مشغولة او متفرغة لتتعلق
حب السيطرة موجود بشخصيات مش عند الكل بس مجرد هيي بتحب هيك
واصعب شخصيه وقت يكون عند الام حب التملك لابنائها وبتسعى لزواجهن وبتشوف زوجة ابنها انها خطافة
او ما بتتقبل انو ابنها صار عنده حياته العائلية وانه صار مستقل
وكل شي زاد عن حده صار ضده
وفي الامهات المتفهات لابعد الحدود
اكبر مثال جدتي عندها 10اولاد ذكور وكلهن اتزوجوا واول كنة عندها هيي ماما
ومن وقتها لهلئ ما اتدخلت بحياة بابا او باي كنة
واول 14سنة ماما سكنت فوقها
وعشت مع جدتي وشفت كتير
صحيح بتقلق مرات على عمي اذا اتأخر من خدمته بالجيش وبتحب تتطمن عنو
او اذا شافت احد عمومتي متضايق ماديا بتحمل همه بس ما بتلح عليه لتعرف التفاصيل
ولا انها توصل لدرجة انو لازم تعرف كل شي وتفاصيل ان كانت صغيرة او كبيرة
والله شاهد على كلامي
رح اعطي مثال بعيد عن ابنائها بل بيتعلق بشخصيتها مع زوجات ابنائها
كان عمري تقريبا كان عمري 12سنة ماما طلبت مني اخد غرض لخالتي فانا قلت لاء وهيدا شي نادر انو ارفض طلب ماما
فقربت صوبي كرمال تعاتبني وكنا واقفين بالدار امام منزل جدتي حاولت ارجع لورا فاتعثرت بحجر ووقعت وجرحت ركبتي شافت جدتي المنظر كيف الدم عم يسيل وغضبت وقالت كم كلمة لماما
المهم انا بقيت عند جدتي وصارت جدتي تقلي اذا والدك سألت شو صار قوليلو انك وقعتي لوحدك وما تجيبي سيرة اللي حصل مع والدتك
يعني بالرغم ئديش بتحبني ما قبلت يعرف بابا باللي صار
مع انو ماما رجعت لوحدها حكتلو اللي صار

واذاا شي يوم غلطت مرت عمي قدامها وكان في ناس كمان وعمي اجا بدو يحكي شي ما ترضى جدتي وتقلو هيدي بنتنا وكل انسان بيغلط

وحتى ماما وقت زوجت اخي من ست سنين ولهلئ ما بتتدخل بحياتو او حياتها
او وين رايح وشو جايب وشو عملت
بتقول اتزوج وصار عندو حياة وبالنسبة لزوجته اختياره يتفاهم هو وياها ومتل ما بتقبل حدا يتدخل ببناتي ما بتدخل ببنات الناس

وانا هلئ متعلقة باولادي كتير بس مقتنعة مية مية اذا ربي كتبلي عمر وزوجت اولادي
ولا ممكن اتدخل بحياته
انا بطبعي بحب الاستقلالية
وكيد رح احترم استقلالية اولادي
انا مسؤولة عنهن لعمر معين
بس بعدين هني مسؤولين عن حياتهن
كرمال هيك ببقى الام اللي بتحبهن وبتفديهن بروحها
والصديقة اللي بتسمعلهن من دون ملل اذا من نفسهن طلبوا نصيحة او يشكوا شي زاعجهن

واذا كانت النصيحة بتخص زوجته اكيد ما رح شغل عاطفتي لصالح ولدي
الحق حق وعند ربنا ما بضيع حق اي انسان
اما حياتها كيف بتعيشها هيي وابني عندها الحرية الكاملة
لانو طبعي مش رح يكون متل طبعها وتفكيري غير واهتماماتي غير
فليش بدي اتدخل فيها
ابني اختارها والقرار الو يا بيقبل بتصرفاتها شو ما كانت يا يعرف كيف يفهمها اللي،بدو ياه من دون ما يلغي شخصيتها


وحتى في امثال كتير شفتها قدامي ببلدي
في زوجات ابناء مظلوبات بشكل لا يعقل من ام الزوج بسبب تعلقها الشديد بابنها
وفي العكس ام الزوج مظلومة من زوجة الابن وهالشي بتهم فيه الابن لانو ضعيف شخصيه وشايف الغلط على امه وساكت خوفا من زعل زوجته
كرمال هيك بلاقي،افضل شي ما حدا يتدخل بحياة حدا
ومجرد ما يستقل الولد لازم نفهم انو صار عندو حياة خاصة فيه ان كانت اجتماعية او عائلية او شخصية او مادية
والامثلة اللي اعطيتك ياهن ولا وحدة كانت مشغولة بل متفرغين لاولادهم
بس ما وصلت للتدخل بحياتهم


احترامي