اكتشفت انه ضايف بنات على السناب
مسكت نفسي عشان كنا في بيت اهله وورانا خط سفر في مدينه اهلي
سبحان الله نفس الطريقة اللي كشفته انو يدخل على حسابات طليقته ( قبل الدخول ) ويتابعها
وهو على طول اخذ الجوال من يدي
وبيحاول يضحكني ويخفف من دمه
قلت من ( ر ، ن ) قالي اخوه !
مافارقته ولا لحظة لأني ادري انو بيحذفهم
وبيطلعني موسوسة حركاتكم اعرفها ومكشوفة
بعد ماانفردنا في غرفة قلت له وريني الجوال قعد يلف ويدور ومسوي حضرته زعلان
قلت له انت ضايف بنات ! قال لا مو ضايف وكان بيحاول يمشي
قلت حركتك دي اثبتتلي خلاص قال لا مو ضايف وانتي مو واثقة قلت طيب خليني ارتاح وانت ترتاح وخليني اقطع الشك باليقين واعطيني الجوال
لمن حاصرته قالي ايوة ضايف بنات بس مسحتهم من اول بس عشان غيرت جوالي جديد رجع كل شي قديم
قلت سبحان الله اول مره اعرف انو الاضافات ترجع من نفسها !
وراني الجوال وهو ماسكه قالي انو ضايف بنت وبعدين لمن اصريت انو في بنت كمان قالي ايوه
قعدت اطلع وانزل واشوف الاسماء وهو على اعصابه قلت له اشبك خايف خليك واثق !
طلع ضايف 3 وممكن اكثر ماخلاني اشوف ماسك جواله
قالي خلاص انا راح احذفهم وانهم ماعجبوني
قلت ليش ماعجبوك عشان ماعرضوا ........ زعل لمن قلت له ليش ماعجبوك ماتكيفت على 😔
قلت له لا ياعيوني ماابغاك تحذفهم عشاني كشفتك
قلت اشبع فيهم زي ماتحب
وهو زعل وتركني في الغرفة لحالي
بعدها ركبت السيارة وقلت له انا في السيارة
ماقدرت اودع اهله لانو كان باين عليا الانفعال شويا والرجفة عملت نفسي اني مشغولة بترتيب الاغراض لحد ماتسحبت وركبت السيارة

في الطريق طبعا حاول وحاول يكلمني ، يمسكني ، يخفف دمه ، عبر لي عن حبه 😏 وانا طناش في طناش
قلت له خليني لوحدي لاتكلمني ماابغى اسمع صوتك دحين
قالي انا طفشان ايش اسوي الطريق طويل وانا مقدر انك تطنشيني كده والله تتعبيني مو حاسة بيا انتي تدري انو انا احبك والله احبك ومااشوف حياتي من غيرك وممابغى تروحي لاهلك وانا السبب في زعلك وضيقتك
قلت بسيطة ياعمري افتح السناب اتفرج على اللي ضايفهم واتسلى معاهم ويروح طفشك
وليه تحسب اني زعلانة مو زعلانة واحتفظ بحبك لنفسك وللي ضايفهم عادي حبيبي بس مالي نفس اسمع صوتك واكلمك خليني بحالي

كنا مخططين للسفر لوحدنا ، وكنت مخططة اعمل له مفاجأة واحتفل معاه عشان عيد ميلاده وذكرى زواجنا
راح اسويه في نفس الفندق حق زواجنا
واهديه ساعة ابل اللي حاببها وكان بيشتريها لنفسه بس انا كنت امنعه واتحايل عليه علشان اجيبها له

الصراحة انسدت نفسي وخرب كل شي مالي نفس للسفر ولا احتفل معاه ولا شي
وراسلني على الواتس نسافر لدولة عربية كم يوم تغير جو
بما انو جوازي ضايع ولسا ماطلع قلت له ماابغى بس هو قاعد يصر عليا
ساعات اقول ايوة اسافر وانبسط واتونس وهو ......
وساعات اقول لا مايستاهل اسافر معاه ونفسي مو متقبلة معاه اي شي ولا اي شي يسويه

ساعدوني ابغى يعدي الموضوع عليا كأنه ولاشي ، كيف اخليه مايهمني لااتعب ولا اتأثر ولا اتخبط واقعد ابكي ليالي وايام وشهور
ابغى احب نفسي اكثر واخليه على الهامش واحسسه بأنه ولاشي مايهمني باللي يسويه يكلم ، يتفرج على بنات
يتزوج
مااغار عليه ولا احبه ذاك الحب
كييييف ؟