أنا كمان بعد أسبوع صارت بيننا مشكلة ماكانت كبيرة بس مزح معاي مزحة كانت ثقيلة عديت الأولى وبرضو عديت الثانية المرة الثالثة زعلت منه وتهاوشنا عليها ووصلت له فكرة إن البنت مو نفس الولد ماعندنا مزح ثقيل زيهم .. إن السخرية من الآخر في شي خلقة الله مثلا هذا قصير وهذا دب تضايق لأنه شي مايتغير ويسبب حساسية مع الوقت

وفهم وأعتذر وحلف إنه كان يمزح وأنا متأكدة إنه يمزح بس الموضوع هذا من قبل أتزوج مسبب لي عقدة وأتحسس منه وبرضو أنا عروس أبي دلع وغزل مو محشات والحين إذا تذكرنا السالفة نضحك

أكثر من مرة صارت إنه يمزح معاي وأزعل بس غصب عني ما أكون أعرف إنه مزح وأحيانا النفسية تكون سيئة أسبوع في الشهر وأكون أصلا مو متحملة نفسي

الحين فهم هذا الشي وقدر

وهو كمان كان يزعل من كلمات أنا أقولها بحسن نية وبمزح وصرت أتجنبها الحين

لا تتحسسين وقولي له بدلع سبب زعلك في وقت مناسب وحبذا قبل النوم حطي يدك على راسه او امسكي يده وقولي أنا ما أبي ازعل منك بس غصب عني .. أمر بتقلبات نفسية وأعيش وضع جديد وكذا .. وأنت برضو خف علي لاتمزح معاي زي أصحابك .. أنا أحبك وأبي أكمل حياتي معاك وترا كل زوجين يتهاوشون كثير في البدايات لأنهم مايعرفون بعض مضبوط

ونصيحة لك " أخفضي سطح التوقعات والأمنيات المتعلقة بزوجك قليلا حتى لاتستغربي أي تصرف ويجي في بالك توقعت انه بيسوي كذا " بعض البنات وأنا منهم نتوقع إن الزوج بيكون كل شي وبيملأ حياتنا حب وشوق والحياة كلها رومانسية وإذا بدأ الجد نتحسس من انشغالهم عنا ونتهمهم بالتقصير

بس يرضو خليك متفائلة إنه مع الوقت بتيعدل وتكون حياتكم جميلة ومتفاهمين

والله يوفقكم ويسعدكم