المضحك بالموضوع إن زوجي يبغاني أحمل مرة ثانية
ما أدري هو يستهبل والا صادق ! أنا وصلت لمرحلة إنه ماعندي ردة فعل من كمية القهر اللي أحس فيها ..
أحس فيه نار جوا قلبي ولو بتكلم بصرخ بكلام مو مفهوم ومو عارفة حتى كيف أعبر عن اللي بقلبي !
يارب وصل لكم شعوري 😿
بنتي عمرها سنة ونص والله عمره ماغير حفاظتها
عمره ما نومها الا مرتين أو ثلاث أكون أنا أشتغل
عمره ماقال عنك خليني اضف السفرة وأغسل الصحون
عمره ما قال خليني آخذ البنت عنك واطلعي أو ارتاحي
أصلاً زوجي غير مؤهل إنه ينتبه لها لأنه يزيد قهري قهر .. ع أساس ينتبه لها ويجلس عند جواله وبنتي تعيث بالأرض فساد تكسر الكاسات اللي حاطها ولا شالها .. تلعب بالاكل اللي حاطه ع الطاولة ولا شاله

هههه أي مشوار أبغى أروح له يكون جوابه : طيب والبنت ؟! يعني حتى مو متعب نفسه ومفكر ايش بسوي ببنته ..ياناس اقسم بالله أنا أطرّه وألح عليه عشان يودينا حديقة كأني أنا اللي بنبسط !! حرام البنت لازم تلعب مو محكورة بشقة ضيقة !
لا ما يفكر بهالشيء أبداً ولا هو أكبر همه ..
عمره ما خذاها من نفسه وطلعها لشيء .. طيب ع الأقل بقالة .. أو محل ألعاب .. أو حديقة !
لا ومستغرب يقول البنت ليه ماتحبني !
والله ماتحب زوجي هي . تحب جدودها وعمانها الصغار أكثر من أبوها


حتى لو فكر انه يغير لي جو قاللي ياللا مطعم او كافيه .. تنكد علي بنتي لحد ما اقوله رجعني البيت خلاص .. والمفروض اني اكون غيرت جو وانبسط !!

لي أسبوع منثبره بالبيت أسبوع كامل ما طلعت من البيت .. مو فاضي لي يا مباراة يا اختبارات يا أصدقاءه .. لما خلص قاللي الجمعة كله لك .. تعويض ع أساس !!
نزل لأهله العصر وجاني قالي ايش رايك نطلع كافيه .. استغربت لأنو عادةً مايحب المافيهات يحب القهوة العربية بس .. قلت أوك حلو .. ووالله مستغربة منه 😂
ركبت السيارة قلت له ايش نروح ما احب الكافيهات السريعة ابغى كافيه اروق فيه ابغى كريب او فوندو .. قال بعيد ومدري ايش .. خلينا ستار بوكس الحبن .. قلت ياللا .. اسم اننا طالعين !

ونروح ويجيب لي قهوة لحالي وحلا لي ويجلس عند جواله .. وياللا اجلس الاحق البنت تروح لطاولات الناس .. يعني صدق انقرفت .
لما ركبنا السيارة قلت له امابغى نروح للبيت اصبر اطلع للشارع الرئيسي بشوف الشوارع لي اسبوع ماشفتها 😂 ونكدت علي بنتي من ركبنا السيارة تبكي ما تبي كرسيها .. احد ماقلت له خلاص رجعني البيت ..
رجعت البيت ع اذان العشاء .. وقال ياللا بطلع لربعي 🌚 يعني تطليعة الكافيه هذي تسكيته .. وعليها الى الساعة 2 ونص ..

طبعا جاي ومبسوط والضحكة من هنا لهنا .. وأنا النكدية اللي مديت بوزي والمفروض اني اخمخمه واقول له اني اشتقت اه .. ايه واكشخ له ولابسة له هاك الفستان واارقص له بعد ما استحي ع وجهي من الساعة 7 الى 2 ونص وبنتي صاحية وتحوس وتخرب وتصيح وانا الاحق وراها .. وهو يكركر مع ربعه ومبسوط .. ولا جاء قالي ابغى بيبي ثاني !!!

صبرك يارب .