اخاف و اقول حرام
بعدين ربي يسخط عليه ..

هو مسكين يحاول يبر فيهم
لكن هما ما يعجبهم العجب ..

حتى مرة قلت له مثل ما تطنش امك و ما ترد عليها ..
اكيد تعمل معايا و انا بنت الناس ..

قالي انت ما تعملي مثل ما هي تعمل .. و تزن علي
حتى لو اقولها تعبان .. لازم دحين دحين

مهرة .. هي عشان الفلوس تعمل اي شي
و انا جربتها فعلا الفترة الماضية ..

يعني ما تقدر حالة الشخص و ما تحس بالي قدامها ..
عندها درجة الاحساس معدوم .. و عندها درجة الانانية و الطمع عالية جدا ..

انا مابغى أتدخل ما بينهم ..
كافية شري ..

بس يحسسوه انه انسان عاق ..
و انه اخوه الكبير الي يضرب زوجته و يجبرها تخدم اهله ؛ هو البار و الصالح ..

حاول فترة انه يصير بار بهم ..
بس ما يرضيهم الا انه زوجي ( يذلني ) و ياخد راتبي و يعطيه لهم ..
او يشغل اولاده خدم عندهم ..
و ينقهروا لما يشوفوا اولادي لابسين احسن لَبْس و مدخلتهم احسن مدارس
و ياكلوا احسن اكل .. زوجي زمان كان مثلهم و كان ينقهر لما اصرف على اولادي و يتمنى لنفسه

و هما مو مقصرين على نفسهم
و عندهم و يكنزوا من كثرة البخل ..

و أزواج بناتهم موظفين برواتب عالية
الله يزيدهم

.
.

طيب مهرة ..

انا ما ابغى برضو انه اولادي بيوم يكبروا و يصيروا عاقين بابوهم لا سمح الله
مو يقولوا انه الشي هذا - دين !؟ -

و زوجي صاير يهتم بأولاده و يسعى لراحتهم
يروشهم ماشاءالله و ينيمهم و يخدمهم و ما يبخل عليهم بشي ..

يعني انا كفاية عليا اني احاول احافظ على استمرار رعايته لنا و صرفه عالاولاد و البيت
و تحمله للمسؤولية ..

المفترض اهله يفرحوا و ينبسطوا و يحمدوا ربهم ..
و في الشغل يمدحوه ماشاءالله مرة كثير ..

هو فين كان .. و ايش صار !؟

ايش بيدي اعمل !؟

انا مبردة نفسي و مطنشة ..
بس جربت كل شي .. و خلاص مو بيدي شي اعمله او أقدمه
بالعكس لما انصحه يتقرب منهم و يصلح علاقته بهم ..

يضروني و يسببوا لي مشاكل
بس ابغى التوفيق من ربنا في حياتنا ..