يا اختي والله كأنك تتحدثين عن وضعي مع زوجي في بداية حياتنا

أنا حساسة بزيادة وأحاسب زوجي على الكلمة والزلة لدرجة اني قلتله مره نفس جملتك اللي لونتها بالأحمر "انتقي كلماتك" أو (حاسب على كلامك معي حتى ماتجرحني)

تدرين وش رد علي؟ قال بالحرف الواحد (هذي ماهي حياة!! أجل أحاسب على كلامي مع زوجتي اللي المفروض تتقبل مني كل شيء؟!!)

أنا وانتي ويمكن فيه غيرنا قاعدين نحط حواجز بيننا وبين أزواجنا..

الزوج ما يبي زوجة تمسك له الزلة وتنكد عليه ع الطالعه والنازلة .. الزوج يبي زوجة (ماراح أقول فرفوشة لأن مو بإمكان أي وحده انها تصير كذا) بس ع الأقل تتغاضى وتغض الطرف عن الأشياء اللي ماتعجبها في زوجها

وعلى فكرة أخطأتي لما ذكرتي لزوجك في الرسالة ان ماعاد للحب مكان بينكم وأكيد زوجك فهمها انك ماعاد تحبينه.. لأن الرجل يفهم الظاهر من الرسالة ومايدور على المعنى الضمني مثلنا يالحريم نطلع ألف تفسير وتحليل للكلام ههههه

زوجك يقولك الحب بيننا موجود لكن الحب هذا لازم يظهر في أفعالك لأن الشخص المحب (يتقبل كل شيء من الحبيب) تقومين تقولين له أصلا ماعاد للحب مكان بيننا؟!!

والمشكلة انك تكذبين عليه في مشاعرك لأنك تحبينه وتموتين فيه ههههه

نصيحتي لك أظهري حبك لزوجك وتغاضي عن أخطاؤه (رغم اني ما أشوفه أخطأ في هذا الموقف بالذات بل أرى أنك انتي المخطئة)

ابتعدي عن النكد والحساسية الزائدة تراها سبب في نفور الناس من حولك وأولهم زوجك

أنا زوجي كان دائما يبادر في الاعتذار وبعدما صار يتكرر زعلي صار يتركني ومايعتذر الين أرضى من حالي ما ألومه طفش هههه

اذا صدر من زوجك كلام أو تصرف زعجك تعوذي من ابليس واستحضري المواقف الحلوه بينكم

وحاسبي نفسك قبل لا تحاسبين زوجك

اذا في رأيك اللي يحب يحاسب على كلامه ومايجرح حبيبه كمان زوجك في رأيه اللي يحب يتقبل حبيبه بكل عيوبه وأخطاءه ومايزعل منه على أتفه الأسباب

أشعر انك تطالبين زوجك بالكمال والمثالية وهذا مستحيل لأن كلنا بشر نخطيء ونصيب!

وفقك الله

__________________
اللهم لا تجعل الدنيا أكبر همنا ولا مبلغ علمنا ولا إلى النار مصيرنا واجعل الجنة هي دارنا وقرارنا