سقيا حبيبتي وصغيرتي وروحي انا كم مرة قلتلك انك بتستاهلي حب زوجك واكثر
ليش يا قلبي مستكترة هالشي عليكي
سقيتي صغيرتي ما تدعي القوة خليكي متل ما انتي
حب زوجك الله زرعه بقلبه بقوتك وبضعفك بصحتك وبمرضك
هيدا من رب العالمين حبيبتي
متل ما ربنا ابتلاكي بالمرض عوضك بحب زوجك ربنا ارحم علينا من انفسنا
احكي اللي بدك ياه حبيبتي وفضفضي وكلنا بعد الله جنبك
وهيدي الكلمة انت اللي كنتي تطلبي من الاعضاء يفضفضوا

سقيتي انت اقوى مني بس كمان انت بشر وهلئ عم تمري بمرحلة الانفجار
من بعد ما حملتي نفسك فوق طاقتها
سقيتي لو ما عملتي شي ولو ما قدمتي شي حب زوجك الك رح يزيد ماشاءالله تبارك الرحمان
بتعرفي ليش لانو هالحب رزق من عند الله

بتعرفي من ورا الشاشة حبينا سقيا الطفلة الصغيرة والمرأة الحكيمة والانسانة المؤمنة من خلال حروفك فكيف زوجك اللي شايف وحاسس بكل هالشي قدام عيونه

حبيبة قلبي وقت نتزوج بنتزوج عالحلوة والمرة وعالصحة والمرض لربنا يفرقنا وبتعرفي مين بطبق هالكلام فقط اللي بحبو بعض وحبهن حب روحي مش حب جسدي

وفي كتير اشخاص عاشوا هالحب واذا بنقول النساء بتصبر اكتر من الرجال
بعرف حالات في رجال انحرمت من الاولاد وانحرمت من حقهن الشرعي وضلوا متمسكين بزوجاتهن لانهن ما بيعرفوا بطعم السعادة ولذة الحياة الا وهني بالقرب من زوجاتهن وحبيبات قلوبهن
هيدا مش مجرد حكي يا سقيا وممكن يستغرب بعض الناس انو معقول في هيك اشخاص
صدقوا في هيك اشخاص وما رح يصدق هالحكي الا اللي عرف شو هوي الحب الروحي
وزوجك يا سقيا واحد منهن وسبق وقلتلك هالكلام
حبكن حب روحي بيكبر وبيكبر ولا بيوقف قدامه لا مال ولا اولاد ولا غريزة ولا صحة ولا شي بيقدر يخليه يتراجع

فضفضي يا حبيبة قلبي وخلي كل الافكار اللي عم تضايقك تطلع منك
ورح ترجعي سقيا اللي بتربط شعرها قرنين وبتحمل سوسيت هيدي الطفلة المشاغبة اللي بحبها الصغير والكبير
ورح ترجع سقيا المرأة والحبيبة وست البيت اللي اتفوقت على ستات بيوت بكامل صحتهن

استمتعي بنعمة قرب زوجك منك شخص بيفهمك اكتر ما بيفهم حالو
انسان ما بيحس بطعم السعادة الا وانتي جنبه
خليه يكون دوائك يا سقيتي بعز المك
وخليكي فرحته باحساسه بقربك

سقيتي رجاءا ما عاد تجلدي ذاتك عيشي كل لحظة بلحظة مع حبيبك وما تفكري ببكرة ولا باللي بعده
هيدا علم الغيب عند رب العالمين
واذا كنتي مفكرة انو بتضحيتك وبعدك عنو بتكوني عملتي منيح مع زوجك هون انتي غلطانة حبيبتي
بل عم تعذبيه اكتر
اعطيه الامان يا سقيا انو ما رح تتخلي عنو لو مهما صار
لانو حبك بكفي زوجك وزوجك انسان مؤمن ولا راكض كرمال زينة الدنيا ان كانت باولاد او بنساء او بمال بل هدفه الاخرة وحب الله ثم حبك
فلا تحرميه ولا تحرمي نفسك من هالشي
من كل قلبي عم ادعيلك وربنا معك وبعد فترة رح تقولي انا ليش حرمت حالي خمس ايام من حبيبي وحرمته مني

الله يسعدك دنيا وآخرة صغيرتي
احترامي

__________________





اللهم إني أستودعك ديني و نفسي وأهلي وزوجي
وأولادي وأحبتي فاحفظهم يا من لا تضيع ودائعه