المشاركة الأصلية كتبت بواسطة حظي حلوو

شكرا روح الطير
الله يرزقنا حسن الظن


مهره اسعدك الله داءما كلامك مريح وينير بصيرتي
جزاك الله خيرا

لكن يا مهره
النقطة الاخيرة هي مصيبتي ومشكلتي واعني هنا

1 _ انا داءما ظاهري عكس باطني
يعني تلاقيني مبوزه وسااااكته تقولين عندها مصيبه
وانا والله اكون رااااايقه ومبسوطه "بس مالي نفس اتكلم"
هنا الناس يقولون يا كافي شويه وتبق هذي!

هذه مشكلتج يا حظي .. مب مشكلة الناس.

إذا كان ويهج يعكس حالة سلبية .. فكيف تبينهم يفهمون إنج من داخلج رايقة ومزأططة؟!

على فكرة أنا نفس الشي .. وجهي في وضع اللاتعبير يكون مائل للحزن .. وكثيرون كانوا يسألونني: ليش زعلانة؟! .. مع إني لا زعلانة ولا شي .... وعمري ما فكرت إن المشكلة فيهم أو استنكرت هم ليش يظنون فيني شي مب صحيح .... وكنت أقول لنفسي: ما دمت مب قادرة أعدّل تعابير ويهي فالمفترض أتقبل كلامهم أو تخمينهم لحالتي النفسية .. وأكتفي بالرد: لا أبداً مب زعلانة ..... وهم بكيفهم صدقوا والا لا.

في النهاية صرت أرسم ابتسامة خفيفة على وجهي يمكن تمحي تقاسيم الحزن اللي مالها داعي.

2_ انا من النوع اللي كلامي قليل من يوم عرفت الدنيا
فلما يشوفوني الناس ساكته وانا كبيره وما تزوجت
يظنون اني معقده وهذا من اثر العنوسه علي😂
مع اني عايشه معهم طول عمري وعارفين من طبعي كثرة السكوت
ليش يوم كبرت حطوا المجهر على هذي الصفه فيه وفسروها عقده؟!!

أنتِ تعتقدين إنهم يظنون إنج معقدة .. وإلا قالوا لج فعلاً إنج معقدة؟!

ترا تفرق.


شوفي .. مسألة العنوسة لي باع طويل معها .. وسواء كانت الناس تقصد بالفعل أو إنج تتوهمين وتفسرين كلامهم على غير مقصده .. في كل الأحوال مالج إلا التجاهل أو تاخذين الكلام بروح رياضية وتحويلنه إلى مزح وتعليقات ساخرة.



3_ عندي سؤال
ما يجي ببالك احيانا ان هذي تقصد كذا وكذا لكن انا بطنش وبسوي نفسي ما فهمت
واعيش ما كاني فهمت مقصدها من كلامها؟؟غصب عنك جاك احساس انك فهمتي نغزتها
لكن بتكبرين راسك وتطنشين وفعلا تنسي الموضوع وتعيشي بسلام
يجي ببالك هالكلام يا مهره ام لا ؟؟
جاوبيني لان لي تكملة لكلامي