مجتمعنا فعلا غريب
بعض أولياء الأمور
يحط مواصفات معينة في باله بالشاب المتقدم
مثل الوظيفة ، الفلوس المستوى الاجتماعي
يجي واحد عنده هالمواصفات .. خلاص على طول ينقز لخطوة العقد
بالذات لا كان من الجماعة أو القبيلة او القرابة
يقولك عيب اسأل عنه وش بيقولون عني الناس ؟
و اخاف اسأل و الولد يتضايق و يطير مني

و هذي صارت في 3 زيجات
و سمعت هالتبريرات بأذني و انتهت 2 منهم بالطلاق

..
مرة حدث لي موقف مشابه
اتصلت علي قريبة لي تحكيلي انه خطبوا فلانة
و يسألون قريبتي عن أخلاق هالبنت
- بنت معروفة جدا في محيطي بسمعة غير طيبة -


تقدم لها شخص من الخارج
قالت لي وش اقول /
قلت لها قولي الصدق لكن بطريقة عامة
يعني مثلا الله يهديها أو أي أمر آخر
قالت / كذا ممكن أقطع نصيبها ؟
قلت لها الرازق الله مو انا و لا انتي
و هذي أمانة انتي انسألتي عنها !

عموما القصة لها سنوات .. و البنت الحين تابت و عقلت و تزوجت

* بإختصار كلمة : أقطع نصيب فلان و علان
هذي خرافات و خرابيط منتشرة عند الناس
الرازق الله و كلن بياخذ نصيبه طال الزمن او قصر .
الافضل ان الشخص يتكلم بكل صدق و أمانة عن اللي يعرفه و "متأكد منه البداية"
ولا انه يغش او يكذب و يساهم في إيجاد ضحية جديدة مطلقة و يحط بذمته.

__________________
اللهم اجعله لي كما أحب ، و اجعلني له كما يحب ، و اجعلنا لك كما تحب.