بنرجع لسؤال كوكي
والله يا كوكي مش قصة بينقص عقلها بس كل انثى بتحب تكون محبوبة من الجنس الآخر
او تكون محط اعجابه وتسمع المدح اللي بيرضي انوثتها مهما كانت ثقتها بنفسها عالية
وتلاقي شخص يدخل قلبها وتأثر قلبه وهيدي بطبيعة الانثى وغريزتها ولو اختلفت درجات التعبير بيناتهن
واكيد بتختلف اختلاف كلي عن محبة واهتمام الوالد والاخ والابن وشرحت هالشي الخالة بيتا
فكيف اذا كان هالشخص الزوج فمشاعرها وعواطفها واحاسيسها الانثوية بدها تفجرهن وبنفس الوقت بتحب تكون متبادلة من الطرفين
بس اهم شي تعطي بتوازن مش من دون وعي لانو الزائد متل الناقص
وبالنسبة الي نص نص مرات عاطفية ومرات عملية بحب كل شي بوقته
واعطي كل شي حقه
ما بحب امشي على خط واحد ونمط واحد بختنق
يعني بحب اسمع الاطراء والمدح وخاصة من زوجي ولو سمعت العكس ما بيأثر فيني (البنت واثقة من نفسها )
ومتل ما قالت مريومة ما بطلب الحب والاهتمام من حدا حبي لنفسي كافي
اصلا هيك شخصية لوحدها بتجذب الطرف التاني متل المغناطيس ما بدها اتنين يحكوا فيها
وبنفس الوقت ما بحب الالتصاق بختنق وبهرب بحب يكون في دايما مساحة للطرف التاني
يقدم كل شي من تلقاء نفسه
بحب اسمع متل ما بقلي زوجي مثلا :
مرات بقلي مش طايق شوفك
ومرات بحبك وقت تكون معصبة وبحب عصبك اكتر
ومرات بقلي بتحيريني كيف بتكون غضبانة وبعد شوي بتقلبي لحالة الفرفشة والضحك
بحب ضل لغز واصلا انا بحب كون من كل شي
بس هيدا ما بيعني انو مرات ما بشوف حالي انو عقلي نقص ههههه
انا اوقات بقول لحالي انو بالفعل اني بلا عقل بس بمطارح بعيدة عن المشاعر
انو كيف اتنازلت بوقت ما لازم اتنازل وكيف سكتت بوقت المفروض احكي
وكيف كنت ضعيفة بوقت لازم اضهر قوتي وكيف كيف .....
بس هيدا هوي الواقع
ما في شي مثالي ولا متل ما بدنا
ودايما في منغصات بكل شي
ودايما في دروس
والحياة عند الاهل ما بتشبه الحياة مع الزوج ولا الحياة بعد عشر سنين لقدام
الفكر وطريقة التصرف واخذ القرارات وتقديم العطاء وغيرهن كلو بيختلف من مرحلة لمرحلة