رد: طلبت الطلاق
لحد الآن ما أكلمه ولا يكلمني.
كنت أبغي فلوس .. وابغي بطاقة البنك عشان أروح الجمعية .. وأبغي أوراق رسمية خاصة بمدرسة اليهال ... بعثت له مسج باللي أباه .. بعث لي: حطيتهم على الطاولة .. وطلب صورة شخصية لشما عشان بطاقة التأمين الصحي في نفس المسج.
كان عندي موعد مع معلمة سلطان في المدرسة اليوم .. ولأني ما أكلمه فبعد ما وصّلت شما الحضانة ورجعت البيت خليت سيارتي برا الكراج عشان يفهم إني طالعة.
الظهر سويت الغدا .. وما عملت حسابه.
وباقي اليوم مرّ بالروتين الاعتيادي .. عدا إن احنا ما نكلم بعض.
.
.
.
المهم
أمي ما قدرت!!!
سألتها اليوم إن كانت تكلمت معاه.
قالت لي: تكلمت معاه يوم الجمعة .. لكن والله يا ميرة كانت على طرف لساني وما قدرت أقولها! .. كيف أقول له طلقها؟ .. كيف أخرب بيت بنتي بنفسي؟!!
قلت لها: ليش جذي يمه؟!! .. أنا ما بغيتج تتكلمين معاه في شي .. الله يسامحج!
قالت: يا أم سلطان إنتي بنتي .. والله يشهد إنج عزيزة وغالية عليّ وما عمري شفت منج شي يكدر خاطري .. ودايماً أقول للناس ياليت كل حريم العيال مثل ميرة .. ما يهون عليّ أشوف بيتج ينخرب .. وما أقدر أكون طرف في هالخراب.
مب هو ولدي؟ .. أنا أقول لج طنشيه طنشيه طنشيه .. دخل طلع ما عليج منه .. وإنتي عيشى لنفسج ولعيالج .. استانسي لنفسج ولعيالج وما عليج من شي .. وعيشي في بيتج معززة مكرمة وانسيه كلش.
الرياييل الحين كلهم جذي .. ما أدري كيف صايرين يفكرون .. ما يفكرون إلا في نفسهم وما يهمهم شي.
انا أقول ارجعي لشغلج .. خلاص شما السنة الياية بتروح مع اخوانها وانتي ما بيكون عندج شي .. وقت فراغ كبير إذا ما مليتيه بالشغل الوسواس والشيطان بيلعبون بعقلج (كررت موضوع الشغل يمكن أربع أو خمس مرات في هذا الحوار مع إني ما قلت لها عن نيتي إني أرجع أشتغل)
قلت لها: ولدج ما يبا جذي .. ما بيخيليني أسوي اللي أباه.
قالت لي: وقتها اوقفي في ويهه وقولي له مثل ما انت شايف حياتك وتسوي اللي تباه .. أنا بعد من حقي أشوف اللي يريحني وأسويه (نفس كلام مسز داني) .. وكثّر خيرج تمّيتي مع عيالج لين شما بتدخل المدرسة .. لا رميتيهم ولا أهملتيهم.
سألتها: شو قلتي له بالضبط؟
قالت: قلت له أم سلطان ما في مثلها .. ايلسوا مع بعض عقب ما اليهال يروحون المدرسة .. شوف شو عندها وشو اللي يريحها وهي تشوف شو عندك .. تفاهموا واتفقوا.
قلت: شو قال؟
قالت: سمعني وهو ساكت .. وما رد .. وقام وطلع!
ورجعت تكلمني عن اليهال: الأب ماله دور كبير ترا .. الأم هي اللي تربي وهي اللي تهتم وهي اللي ترعى .. حرام نشتتهم!
في النهاية حلّفتني بعيالي: ارجعي شغلج .. وشوفي نفسج كم شهر .. وإذا تمّيتي مب مرتاحة لج اللي يرضيج وسوي اللي يريّحج وما أقدر أقول لج شي .. بس جربي عشان خاطر هالثلاثة.
.
.
.
بعد ما صلاة العشا استخرت في أمر البقاء .. ووالله إني كارهة.
قررت أرجع أشتغل .. وأعطي نفسي فرصة سنة كاملة.
__________________
اللهم طِيبَ الأثر .. وحُسْنَ الرحيل.
التعديل الأخير تم بواسطة مهره ; 24-01-2016 الساعة 08:28 PM