ومض مافي شي يستدعي الشماته ، لو بيشمت كان حكى والا ضحك والا قالك كلام مباشر او مبطن
يمكن نظرته تعاطف وانت استكثرتيها. عادي ترى الرفض يصير ويتكرر لا تتحسس نفسك وتبنين صور بعدها ،

انت عارفة الوالدة واسلوبها ، اجتهدت انت في تغيير اسلوبها معك ولا طلعت بنتيجة انت غيري
اسلوبك ، انت تشوفين انها تسوي عكس ماتبين وتتعمّد ، اقترحي العكس واظهري حماسك له
لي صديقة قبل لا تتزوج تعاني من اسلوب امها
لا طلبت شي منها ، امها ترفض رفض قاطع وتاخذ العكس ، فاختصرت على نفسها حتى في اللبس
فكانت لما تسألها عن لون الفستان كانت تختار اللي ماتبيه متعمدة فأمها لا اراديا تختار عكسه ( اللي تبيه ) وتختم الموضوع
فعلا اختيارك احلى الله لا يحرمني ذوقك ،
صح مو قاعده ثابتة تمشي عليها بس تخفف من حدة التوتر اللي بينها وبين امها ، وقدرت تعالج المشكلة

لو اقولك نسبة اختلاف وجهات النظر بيني وبين امي قلت هالثنتين ما ينفع يعيشون مع بعض
بس ما يضيرني اسمع وان ما عجبني الرأي او ما اقنعني ما ادخل في تصادم
ساعات اكتفي بالصمت ساعات اتكلم واناقش ،
ساعات اصدع باللي في راسي،
ساعات كثييير كثيييير اساير في اشياء ما ضرتني لو أيّدتها فيها.

قناعاتك انت بتوظفينها في قراراتك ، فما يمنع انك تسمعين لها وتأيدين كلامها في بعض الاحيان
انت الصح ، مابعد كلامك كلام ، طول عمرك حكيمة ، هالشي بيخليها ترخي معك شوي شوي
اكسبيها وبتلاحظين فرق المعاملة، الصبر لحالة مو حل

__________________
"أليس الصبح بقريب"
قال عليه الصلاة والسلام: إني أحرّج عليكم حق الضعيفين ، اليتيم والمرأة.