صحيت ع صداع فضيع ناظرت الساعة وكانت الساعة ست الصباح بدري مرره ،، طلعت من غرفتي أسوي لي قهوه اسبرسوا لأنه بالأساس طار النوم وانا جالسه أصلح لي فنجان : سوي لي معك فنجان
نقزت من صوته : بِسْم الله
فيصل : شايفه شبح
بهدوء مالي خلق هواش ومناقر ع الصبح وصداع : لا بس سرحت وصحيت ع صوتك وتروعت المهم كيف تبيها
وهو يتفحص بأوراق في أيده : مرّه مثل حياتي
آلمتني كلمته ادري يقصدني سويت له الفنجان وانا ساكته ومديته له وخذت فنجاني وجلست ع القنفه وهو جلس ع كرسي المطبخ المقابل للصالون ولا احد منا كلم الثاني ، أشرب قهوتي وأفكر فيه وبحياتي المجهوله هو ليش مو متقبلني كذا لدرجة وجودي مراره بالنسبة له ليش مايبي يجاوبني ويريحني ليش المعامله الجافة ذي رفعت نظري ع الحقائب اللي مجهزهم عند الباب وابتسمت سخريه وسط سرحاني أظن أنا أول عروس يتركها ويسافر شهر العسل لحاله !!
انتبهت من سرحاني ع فتحة الباب ناظرته وإلتفت لي كان واضح عليه بيقول شي لكن ساكت مانطق بحرف وانا كنت انتظره ينطق يتكلم يقول ليش يجازيني كذا يريحني ويريح بالي
لكن نطق عكس ماتمنيته :تركت لك بطاقة الصرافه ع الكومدينا في غرفتي ومعها الرقم السري البطاقة ذي شخصيه اذا احتجتي شي اصرفي منها وتركت لك بعد رقم ولد عمتي رائد اذا نقص عليكم حاجه او احتجتوا لرجال اتصلي عليه أنا مفهمه الوضع وو
قطعته: لاتحاتي أنا مو محتاجه لفلوس ولا رجال غريب عني يقضي لي أموري صحيح أهلي ماتوا لكن أظن معلوماتك ناقصه باقي لي عّم وسند يعزني
قرب مني وتوقعت كف لكن إبتسم : يومه عزّك ليش جالسه باقي هنا أرجعي له
صدمني رده حطمني💔 جا بيطلع لكن إلتفت ثانيه : الفلوس ماتبينها انت حره ووفرتي لكن جدّاني وعلاجهم اصرفي لهم منه ورائد غصبن عليك راح يمركم ويشوف أموركم عجبك ولا الباب ينتظرك طلع وصفق الباب وراه وانا جلست ع الأرض من الصدمة : هذا بايع بايع ليش تزوجتني اذا انت بايع قمت وقفت ولحقته أطلب كرامتي منه اذا انت بايع انا بايعه بعد وإذا أنا مراره في حياتك فأنت زيادة وجع فوق أوجاعي ، لكن للأسف مالحقت عليه نزلت وماحصلته: حميده وين بابا فيصل
حميده : يطلع
ضربت الأرض برجولي من القهر ورديت صعدت غرفتي حاولت أهدي النار اللي داخلي وأفكر بهدوء في البداية فكرت اتصل بعمي يجي ياخذني من هنا لكن فكرت هذا مو حل وبعدين اترك جدي وجدتي لمن هو صحيح كانوا قبل لحالهم من قبل لاأدخل في حياتهم لكن بعد مادخلت أنا تعلقت فيهم حيييل حتى لو ماخذت من عيشتي معهم غير أسبوع لكن يمكن مثل ماقال جدي سالم أنا عوضه بجدي وهو عوضي عن اللي فقدتهم ضميت رجولي لصدري ونزلت راسي وتذكرت أهلي لو ماصار الحادث لو ماماتوا لو ماصار كل هالألم كان أنا مازلت في بيت أبوي وجالسه عند جدي وعايشه حياتي وبهبالي كالعاده والضحك مايفارقني ولا أحسب للوقت قيمه طالما انا موجوده بحضن أعز الحبايب وكان ماجا جدي سالم وطلبني للزواج من المتكبر وكان ماأضطريت أوافق وكان ماجيت هنا أنهان وأنذل كان ماانتركت بأول اسبوع زواج وكان وكان مسحت دموعي وتعوذت من الشيطان وقررت آخذ شور ..
وفي الضحى نزلت اجهز الفطور لشيباني والقهوة والشاي وتركت كل اللي أزعجني ضايقني يسافر معاه اذا هو بايع بسلامته أنا وافقت ع الزواج هذا لمصلحه ذاتيه وان كنت أشوفه ظلم له لكن أقنعت بالحياه يتغير كل شي لكن بما انه يبي الشي هذا أنا ماراح أذبح عمري عليه ، أنا جيت هنا أعوض كسري وأجبر قلب مكسور يعاني من الفرقا ،
بعد ماحصلته تجهيز طلعت لهم وحصلتهم كالعاده جالسين برأس بعض ويسولفون ناظرتهم بحب : صبحكم الله بالخير
الجدان: صبحك الله بالنور والسرور
الجد : ي زين الصبح الى مني تصبحت ع وجهك ي غلا جدك
أنا : هههههه خذ بعقلي حلاوه
الجد يضحك : هههه أقوله صادق وانا جدك
جلست جنبه اتدلع عليه : اذا تقوله صدق أجل يوم تصبحت بالعين الكحيله كيف كان صبحك ها ؟
الجد إلتفت لها بحب : هو بس الصبح اللي يزين لا والله الا كوني كله يغدي زين بشوفة العين الكحيله
الجده إستحت وغطت وجهها بالشيله وانا فطست ضحك ي حلو حب الشيبان وخجلهم تحسه صافي حب حقيقي وقوي يكفي انه صامل بعد كل هالعمر اللي مضى ..
الجد يضحك معي : ههههههه الله يهداك أحرجتي جدتك
غمزت لهم : أنا ولا أنت مالقيت حد يشجعك وتتهور
الجد : هههههههه
الجده تضيع السيره : وين فيصل مانزل معك
حاولت ماابين ع ملامحي : الا لكن صاحين من بدري حنا أفطر وتوكل ع الله
الجد : الله يسمح دربه ويوفقه
الجده : أستودعته الله
الجد : بنتي اذا تبين تروحين بيت عمك إلين يجي زوجك أوصلك مع السواق
شعور كريه أستوطني: لا مايصير أجلس هنا
الجد مسح ع راسي : افاا يصير ونص وأبركها الساعات بس قلت يمكن لك شوفه ثانيه
ضميت يده : لاشوفه ولا غيرها فيصل يسافر يرجع بكيفه لكن عنكم ماراح ابتعد أبد وانتوا بعد لاتتركوني<< هنا تغيرت بحة صوتي >>
الجده ضمتني من ع جنب : وش ذَا الكلام حنا نلاقي بنت مثل القمر ونتركها
الجد: وش فيك ي بنتي فهمتي كلامي غلط صايره حساسه افا عليك بس ، خلونا نبدأ بِسْم الله
أبتسمت لهم وبديت بالفطور لكن عقلي سارح اتخيل لو ماهم موجودين طردت الفكرة بسرعه
وناظرتهم ماراح أترككم ولا بترك حد ياخذكم مني لو شو ماصار مالي حد بالدنيا هاذي غيركم ..
ومرت ست شهور تغيرت كثييير نسيت فقداني لأهلي وتقبلته كلياً قبل مايمر يوم الا وأتذكرهم وافتح ذاك الدفتر واسولف له وأنام ع دموع لكن سبحان الله يترك الدوا في أعجز خلقه وجدت سلواني عند شيباني عوضوني دللوني ويخافون عليّ من كل شي يأذيني كانوا لي الدرع من اي خطر يواجهني حتى من أي لسان يتكلم بحقي في البدايه ماراح اكذب عليكم وع نفسي وادعي القوه وإني ماتأثرت لكن بيوم من الأيام كنّا مجتمعين كعائله كان كل خميس تتجمع العائله عندنا بيت الجد وكنت أقوم بواجبي ع اكمل وجه وبرحابة صدر ومن غير مايطلب مني ، من ضيافه الين العشا نسوان ورجال واتفنن بمهاره<< لأنه أحب الطبخ كثيير
المهم كنت جالسه واضيف العائله وقالت لي أخت فيصل : انا لو مكانك يتركني زوجي بأسبوع زواجنا ويتركني لكلام الناس اللي ماترحم اجمع مابقى لي من كرامتي وارجع بيت أهلي اووه نسيت أقصد بيت عمي
صدمتني لكن رد بصوت حازم : هديل هي في بيت أهلها واللي وده بالطلعه يطّلع باللي مايحفظه هديل بنت هالبيت وإذا ع كلام الناس اللي يجيب سيرة بنتي بالعاطل أقص لسانه واسفح دمه وانتي ي لطيّيف إن شفتك تضايقين بنتي بكلمه او فعل كسرت هالعصا ع ظهرك فاااهمه << صرخته ألجمت كل ألسن الحاضرين وقتها عرفت انه لي سند قوي مثل الجبل شامخ مايهتز وقتها كل مخاوفي تلاشت وتعززت قوتي منه وقته تركت كل حمولي تستند ع ظهره لأنه تأكدت مهما تثاقلت ماراح ينهد ويكسرني ثانيه جدي سالم جعل عمرك يطول أعوام وأعوام بالصحة والعافيه يارب ..
وقتها خذت عهد ع نفسي حياتي كلها راح تكون لهم وبس وفيصل سواء تقبلني او لا سواءً
رجع او لا مش مهم المهم في حياتي هم جدي وجدتي وانا المفروض أكون له ممنونه لأنه من دون مايدري أكرمني بشخصين أنا بحاجتهم أكثر منه أبتسمت ونقزتني ع خصري منى : اللي ماخذ عقلك يتهنى فيه
إبتسمت لها : جداني عساني ماعدمهم
بوزت بشايفها: جدّاني مالت ع بالي عمي
عقدت حواجبي : عمك ؟؟! ليش يعني بسرح فيه
منى: وي يعني بما أنكم عرسان جدد< غمزت>> وكله مسافر صار له اممم ست شهور الا أسبوع صح
انا بعدم اهتمام : صح وإذا
منى: يعني تعرفين شوق ولهفه وحركات يعني
ببرود: هذا بعقلك بس
تضحك : يعني كيف بعقلي تقنعيني انك ماتشتاقين له وتفقدينه خصوصاً وأنتم ليسى كناري هههههههههههه
ببرود : هذا يصير بس مع اي زوجين طبيعين مو مثلي انا وعمك
بصدمه : كيف مثلك انتي وعمي
ببرود : بحكم قربك لعمك وقربك لي راح أقول لك ع سر بس انتبهي حد يعرفه
هزت براسها موافقه، أنا وعمك ماكنا مثل اي زوجين ولا راح نكون أبداً ، أنا أنجبرت عليه تحت ظروف وانت تعرفينها لما جاني جدي سالم وقال انه عوض كسري وانا عوضه مدري كيف أُوصِف لك شعوري كأني طفل تايه وحصل يد حنونه تطبطب عليه وتراعيه رغم التردد الا انه ماقدرت أمنع قلبي من انه يوافق وصار الزواج وكنت الاحظ ع عمك هروبه مني بطلعات وسفريات حتى<< سكت >>
منى مصدومه كملي
كملت : عرفت بعد الزواج انه عمك بعد مغصوب عليّ وماكنت برغبته تزوجني بطلب ورجاء جدي وابوي وماقدر يرفض لهم ، وافق تحت ضغوطاتهم واستغلوا عاطفته من ناحيتهم تزوجني وجابني أسكن هنا مع جدي وجدتي لأنه تزوجني عشانه تركني هنا معهم بصفة زوجه لكن مو زوجه
بصدمه : كيييف ؟!
أخفي ارتباكي : بموافقة الطرفين
بعصبيه: مخبل إنتوا ست شهور مع بعض وكأنكم أغراب
غمض عيوني لاتخوني دموعي : لاتزيدينها عليّ ماكنت بحكي لك لو ماأنضغطت
بإستغراب: ست شهور وماتغيرت مشاعركم يعني لابد يصير شي ميل ع الأقل
سكت وفضلت الصمت ماعندي رد نزلت نظري لعند رجولي وهي تناظر فيني مصدومه ..
السلام عليكم ورحمة الله وبركاته
الكل رفع نظره لصاحب الصوت كان واقف بشموخ وهيبه بوسامته اللي تخطف القلوب من نظره غير مقصوده منه ..
باس راس جده وجدته وخواته وعيالهم .. منى تحضنه: لك وحشه ي الوحش
فيصل ضربها ع رأسها بخفه: وحش اللي ياكلك يالبطه .. كيفك ؟
منى وضامه كتفه وبحب : مشتاقين ولهانين
فيصل يبعدها: حشى زوجتي مو بنت أخوي
الجد يضحك : ههههههه قالت اللي غيرهم قالووه بعيونهم
فيصل ناظرني وببرود: كيفك هديل :؟
بادلته بنفس البرود: الحمدلله : الحمدلله ع السلامه
كانت نظرات منى تراقبنا وفيصل ابتعد عنها وجلس حذال جدتي: الله يسلمك.. صبي لي قهوه ي منمن مصدع حدي ..
منى: من عيوني.. مدت له الفنجان" وخذتهم السوالف عن سفرته ، حسيت بضيقه وطلعت من عندهم من غير ماينتبهون عليّ وصعدت جناحي وتسندت ع الباب وخذتني الذكريات لقبل ثلاث شهووووور !!!

للحديث بقيه كونوا بالقرب إن أحببتم
الحمدلله ع كل حال ..

ومضه :
الأوقات المرّه مثل القهوه تجعلنا نستفيق.!!