السلام عليكم وصباحكم سعيد اخواني واخواتي
اشكركم على تفاعلكم الطيب
واعتذر لعدم ردي على كافة ردودكم في الفترة السابقة
لكن يشهد الله اني دعيت لكل فرد بظهر الغيب
الله يسعدكم ويبارك فيكم

نعم انا عرفت مفتاح زوجي
لكن هذا لا يكفي لاكون سعيدة معه
التطورات:
مرضت بنتي قبل أسبوعين.. ومرضت انا معها
واستمر تعبي وتعبها لاسبوع كامل
كنت فيها مقصرة في شؤون البيت والجلوس مع زوجي
وهو عذرني اول يومين بعدين طنشني
بعد ماتحسنت صحتي ذهبت لاهلي يومين
رجعت البيت
وجدت زوجي عصبي جدا وافتعل معي مشكله من ولاشي
تجاهلته
واستمرت علاقتي معه فاتره كم يوم
وانا كنت عتبانه.. وهو متجاهلني.. وجاف معي
كلمت الاستشاري اللي سبق اتابع معه
برر تصرف زوجي لكون اهملته
ولاني ما اهتميت بالعلاقة لاكثر من أسبوعين
شعرت بغصة لاني كنت اعاني وقتها ومحتاجه وقفته
والأسوأ انه بدل مايكون جنبي نكد علي
بدل مايخفف علي تعبي ومسؤوليه بنتي تركني
وصار جاف معي ويتكلم معي بعدوانية

انا لما تحسنت اموري تعوذت من ابليس
رجعت اتزين واتودد له رغم اني مجرووووحة منه
لكن مالقيت أي تجاوب
وماكنت قادرة أكون جريئة اكثر لانه عمل حاجز بيني وبينه

اللي صار امس انه جاء البيت
وانا استقبلته احلى استقبال
سألني عن ولدي الصغير اذا دهنت صدره لانه يكح من يومين
قلت له لا والله نسيت.. ابشر الحين ادهنه
عصب علي ورفع صوته وقال تاكلي بعقلي حلاوه
واتهمني اني ام فاشلة
قلت له ارجوك تكلم معي بهدوء قدام بنتي عالاقل
قال لا ترادديني.. واضح ناقصك تربية
لما قال هالجمله انا انفعلت جدا
وقلت له متربية قبل اشوفك!
هنا هو فرح وصفق وقال ايه ايه هذي انتي رجال بصورة امراه
واتهمني اني ارد الكلمه بألف واني مو انثى الخ

تركته ورحت دهنت صدر ولدي ودخلت غرفتي ابكي
بعد ساعة طلعت لقيته بوجهي
ماكلمته
هو كلمني وقال: مسكينه انثى شكل وهي تكره كل الرجال!!
طلبت منه نتكلم بعيد عن بنتي
بعد ما استفزني بدم بارد
دخلت معه الغرفة وكنت ابكي واطلب منه يبطل هالاسلوب
وهو يناظرني بحقد عجيب!!
سألته دامك كارهني ايش مصبرك علي؟
قال: قدري الخايس والعيال.. للأسف هذا الزواج!!
هنا طلبت منه يطلقني
قال ابشري بس بعدين مو الحين
وانا بعدها قلت كل اللي بخاطري
وانو لي أيام ساكته على تصرفاته واني تعبت
قال انتي تعدلي وارجعك ملكة زي ماكنتي الشهرين اللي مضوا
((قصده الفترة اللي انا كنت متغيره فيها وابادر بالعلاقة))
مفتكر نفسه هو اللي كان متغير مو انا!!
وقتها انا اللي كنت ابادر واتفنن وهو مجرد مستقبل


سألته عن قصده بأني اكره الرجال؟
قال افهميها زي ماتبي!
قلت له: انا ما اعرف من الرجال غيرك.. واحبك وابيك
قال: كذابه انتي تمثلي الحب معي!!
قلت له مافي شي يجبرني على كذا
قال: انتي ماتبي الطلاق خوفا على صورتك الاجتماعية مو لانك تحبيني
قلت له: دام هذا رأيك ارجوك طلقني
انا اتعذب ميه مره معك.. يكفي اني احتاجك وابيك ولا القاك
هنا ناظرني نظرة غريبه
وقال: انتي أصلا باردة.. حدك البيت والمطبخ ومشاغل العيال
بكيت اكثر
ورميت الدبلة بوجهه.. وطلبت اروح لاهلي
قال لي بكرا اخذك لاهلك.. الوقت تأخر
واذا خاطرك بالطلاق تأمرين امر
كان بارد جدا وهو يتكلم معي

دخلت انام بالغرفة وطبعا عطيته ظهري عالسرير
وهو كالعادة معطيني ظهره بالطرف الثاني
وفتح مقطع فيديو لشيخ يتكلم عن التعدد
انا سويت نفسي نايمه وماسمعت شي

الصبح صحيته اخذ بنتي للروضه
وانا وجهي وارم من كثر البكاء


زوجي مايحبني ووجودي بحياته من عدمه واحد
يتهمني اني بارده ويبغاني جرئية ومبادره طول السنة
بنفس الوقت ما اسمع منه الا التجريح عالفاضي والمليان
على كل مشاكلي معه نادرا ما اطلب الطلاق
لكن تعبت منه هالفتره الأخيرة كثيييييير كثيييير
الحمل ثقيل علي وهو صايره عيونه زايغه لبرا
وطول وقته ساكت وسرحان
بطل يسولف معي ويتكلم زي زمان
حاضر بجسده بس وصامت طول وقته
ودايما يتهمني اني ما احبه
وانا اقسم بالله احبه.. مع الأسف الشديد
وانتقادي درجه أولى
رجع يفتعل المشكلات اضعاف زمان

يحز بنفسي انو مالي أي خاطر عند زوجي
وانو علاقتي فيه وصلت لهالمستوى المهين
ولا اتقبل يطعن بتربيتي واخلاقي وانوثتي
ولا اقدر اقدم خطوة بعد كل هالتحطيم اللي جاني منه

حاليا هو بداومه
وانا بالبيت
والدبله مرميه فوق الطاولة
واخر شي قلته له امس: امساك بمعروف او تسريح باحسان
دعواتكم