المشاركة الأصلية كتبت بواسطة خاله بيتا

الموضوع جدا مشوق ولطيف
ان شاء الله يسمح وقتي واقدر اعطيه حقه
بس أول تعليق واول عادة الاحظها للعرب هي الفوضى
البنت تقولكم ناخذ التقاليد بالدور وبديتوا بالضيافة بس ما في فايدة نزلتوا رمضان هلى العرس وخربطتوا الدنيا
يالله معلش سامحتكم أنا
سؤال لأهل مصر ... ما هو الدندي ؟

احنا عندنا الضيافة زمان .. زماااااااان كانت لازم يبات 3 أيام وغدا وعشا وينذبح دجاج وبط ... أما ضيافة أهل القرية لبعض خلال التزاور ما تزيد عن كاسة شاي .
واذا كانت عزومة غدا فغالبا تكون نوع او نوعين من الطبخ .
الان نبدأ الضيافة بالعصير وبعدها مكسرات مع كوب شاي ومصبوب وخالص عالصينية سواء شخص او 50
وبعدها فواكه وبالاخر فنجان قهوة مع حبة شوكولاته
والقهوة غالبا تكون قهوة تركية مش عربية .
أما العائلات ذات الأصول القبلية والعائلات اللي عاشوا بالخليج مثلي فيحبوا يضيفوا قهوة عربية مع تمر او شوكولاته ... وكمان يحبوا يبخروا البيت قبل وصول الضيوف
والعزومة غالبا ما يسبقها اكل او شرب ... الا اذا الضيوف مو جوعانين وراح ننتظر فممكن نضيف عصير
عادة تكون فيها المقبلات والسلطات ونوع شوربة وتكون الطبخات على الاقل 3 اصناف مع رز او الى جانبه الرز .. ويحرصوا يكون في دجاج ولحم أيضا .. اللحم يدل على الكرم والدجاج عشان غالبا الاطفال والشبيبة يفضلوا الدجاج .
وفي اننواع اكل ما ينفع ينحط معاها شي حتى لو عزومة .. مثل المنسف او المسخن او المفتول ... هذي غالبا تنحط بس مع السلطة والمقبلات والشوربة وما يرافقها طبخات ثانية
وبالاخر لازم كنافة أو أي نوع حلو مثل بسبوسة او كلاج او وربات وقهوة
والله يعيننا على حفظ النعمة ... لازم ما نرمي شي وندبر كل الباقي من العزومة
وعندنا نكت أو نوادر تنقال عن الضيافة ... فمثلا يقولك بخيل عزم ضيف على الغدا ولما وصل الضيف قال لابنه خذ ضيفنا لشجرة التين ولما تشوفه بدأ يمسح التينة قبل أكلها فاعرف انه قرب يشبع وساعتها قول له الغدا جاهز
اذا الضيف جاي من مكان بعيد مثلا سواقة ساعة او اكثر لازم نعزم على النومه .. خاصة اذا جاي للتعزية وقريب مضطر يرجع ثاني يوم
واهم شيء بالضيافة خليته للاخر اللي هو الترحيب بالضيف .. وعندنا مثل يقول هليني ولا تغديني ... يعني تستقبلني بوجه مهلل ومرحب أفضل من ان تغديني وتكون معبس .