المشاركة الأصلية كتبت بواسطة أم دان

زوجي مايفرط في عياله،ومن ناحية الولد مهتم فيه وملبي طلباته ويمره يومياً يشوفه وكل يومين يجيبه ويحطه عند حريم العيال مع البزورة ويطلع يخلص أشغاله ساعة أو ساعة ونص ويرجع يوديه لأمه..

أنا صراحة استنكرت الوضع ماعجبني،،وقلت لازم أكلمه..

فاللي صار قبل أسبوع جابه وحطه وخرج ولما رجع كنت أنا راجعة من مشوار،والتقينا بالمصعد،،فقلت له مر علي إذا معاك وقت،،قال أبشري..

جاني بعد 10 دقايق شايل ولده.. قلت له يافلان ولدك على العين والراس،لكن محد من حريم عيالي ملزومة تحفظه وترضعه،،أنا سكت أول عشان الولد أمه راميته لكن الحين الوضع اختلف،

الله يرضى عليك كل ماتجيب ولدك اجلس معه واخدمه،،إذا كبر الولد وصار يعرف يخدم نفسه الله يحييه من غيرك،،لكن ذحين لا ماينفع..لأن كل واحدة من البنات عندها مسؤوليات تكفيها،ولا تحطنا بموقف بيوم يتأففون ويعتذرون،

زوجي عصٌب وزعل وطرطع هذا بيتي ومو إنت تتحكمين وزي ماهم حريم عيالك هم حريم عيالي..وإنتِ مالك دخل أنا ماجبته لك ولا عندك.

قلت له هذه المرة الحريم هذول حريم عيالي وبس رضيت ولا مارضيت عجبك ولا ماعجبك..

عِلِي صوتنا وغلطنا على بعض بالكلام،،
بعدها قلت له هذه المرة إما كلمتي هي اللي تمشي،ولا أنا تاركة لك البيت..

قال اتركيه ولا تهددي..

قمت لبست عبايتي وجيت طالعة صار زوجي يصرخ بأعلى صوته إذا خرجتِ مالك رجعة وإنت بتكونين طالق،

قلت له مابقي شي ماخسرته والطلاق يمكن لي رحمة ونعمة..

أنا صراحة ماهمني تهديده قلت اللي بده يسويه يسويه طنشته ومشيت لما وصلت للصالة وقرّبت من باب الشقة صار يصرخ بأعلى صوته ويقول تراك بتتطلقين إذا خرجتِ ومع صرخته الولد انفجع وصار يبكي...حتى نفَسه كاد يتقطع من الفجعة،،رحمت الولد وجيت شلته الين سكت..

قال زوجي لما إنت باقي في قلبك إنسانية ورحمة ليش رافضته؟

قلت له أنا مو رافضته،،أنا قلت لك تبغى تجيبه جيبه بشروطي أنا،،تبغى تسوي اللي في راسك ماعندي استعداد أتحمل نتايج أعمالك..إنت وحدك من يتحمل..

من فضلكم لا تهجموا علي حتى لو موقفي غلط،،بس أنا شايفة هذا هو الصح..