رد: طلبت الطلاق مستجدات الرد (1139)
يبدو إن موضوع السيارة مب ضابط!
طلعت مع ماما ورجعت من شوي .. وهو رجع بعدي.
من ضمن مشاويره اللي راحها الصيدلية .. لما رجع قال لي إنه تلاقى مع أخته هناك.
اليوم الخميس والاجتماع العائلي الأسبوعي عندها .. قال لي: أختي قالت لي ييب دراجات اليهال معاك. (عاد هو صادق أو يلف ويدور الله أعلم .. لكن آخر مرة رحنا عندها كان زوجي في دوامه وأنا رحت بسيارتي اللي ما فيها مكان لتحميل دراجات البنات .. ولما وصلنا بناتي وعيال خوات زوجي تمو يتضاربون عشان حد دراجته عنده وحد ما عنده)
سكت وتميت أطالعه .. قال: شفيج؟ .. فهمتج .. خلاص نروح بسيارتج ومب لازم ناخذ الدراجات.
تميت أطالعه وأنا ساكتة .. فقال: عاد مب معقول نروح بسيارتين.
قلت له: أخوك فلان رايح؟ (أخوه سيارته كبيرة وفيها مكان للدراجات) .. قال: تعرفين إن فلان يطلع مع ربعه يوم الخميس. (هالكلام صحيح)
تركته وطلعت من الغرفة .. وكانت نيتي فعلاً نروح بسيارتي ومب لازم ناخذ الدراجات .. وفي نفس الوقت قلبي كان معورني على بناتي .. ليش باقي الصغار دراجاتهم معاهم يلعبون ويستانسون وبناتي كل وحدة تتم تترجى كل حد يعطيها دراجته شوي عشان تلعب .. وفي النهاية يتضاربون مع بعض ويصيحون .. مع إن كل وحدة فيهن عندها دراجتها.
لحظتها فتحت المنتدى وقريت الكلمتين اللي كتبهم أخي لماذا نتزوج والغالية إشراقة.
تعوذت من إبليس ورجعت له الغرفة وقلت: كل مرة ترجع فيها البيت تشيّك على سيارتك عدل.
قال: تراني نظفتها.
قلت له: كل مرة .. وأبداً لا تنسى .. لا عقب أسبوع ولا عقب شهر ولا عقب سنة ولا حتى عقب عشر سنوات .. ما أبغي أبداً أركب سيارتك وأحصّل فيها شي.
قال: إن شاء الله .. تامرين أمر.
__________________
اللهم طِيبَ الأثر .. وحُسْنَ الرحيل.