رد: الي ما عندها بنت .. تندم طول عمرها ؟
أخوي هادي ..
إيش تنصحني بتعاملي و تربيتي لأولادي ؟
- أخواني الأولاد .. أمي الله يرحمها دللتهم مرة كثير و لدرجة ما تطلب منهم شي عشان لا يتعبوا .. و طلباتهم كانت أوامر ..
و لما كبروا ، تعودوا .. إنها تخدمهم ، و لدرجة أخوي كان يستغرب ليش انزل كل شوي لما كنت متغربة برة ؟
كان يقول لي اجلسي هناك و لا تنزلي ، أنا لو مكانك ما كنت راح أنزل أبدا للسعودية ..
و لما أقول له أنزل عشان أمي توحشني ، يستغرب مني ..
و لما مرضت أمي ، صح خدموها و شالوها أخواني و ما قصروا الله يجزاهم خير ..
لكن كان من باب الواجب .. و انهم رجال و مسؤؤولين عنها و لإنها مرضت بمرض خطير ..
و أخوي الصغير آخر العنقود ، ما يشوف إنه أمي الله يرحمها ( اللي تعبت و ربته بعد موت أبوي الله يرحمه و هو رضيع )
ما يشوف انها ضحت بأي شي عشانه .. مادري ، يمكن لإنه لسى ببداية شبابه و بيفكر بالطريقة هذه ؟
و أخواني الأولاد ما أحسهم يفتكروا أي شي لأبوي الله يرحمه ..
.
.
و أهل زوجي العكس .. قاسيين عالأولاد .. و ماعندهم شي اسمه دلع أبدا ..
فو زوجي ما كان يرد على أمه ، لما تتصل عليه و يطفش .. و أنا اللي كنت أقول له ما يصير و أعلمه ..
و دحين الحمد لله ما صار يطنشها .. و يعني لو اني كنت شريرة ، كان ممكن قطعته عن أهله ..
و أخو زوجي اللي أصغر منه ، يتهرب من مسؤؤولية أمه و أبوه ..
فقط حالة استثنائية ، أخوهم الكبير اللي يهتم و يبر في أمه و أبوه ..
.
.
المشكلة إني لما كنت صغيرة و بسن المراهقة و لإني بين ولدين و أمي كانت تميزهم عني ..
فكنت أقول لأمي الله يرحمها ، ليش تدلعي الأولاد ؟
الأولاد ما منهم فايدة .. و البنات لكم أجر في تربيتهم و هما اللي ينفعوا أمهم و أبوهم ..
فكنت دايم أتفوق في دراستي و عشان أثبت بداخلي و لأمي الله يرحمها إنه البنت ممكن تكون أفضل من الولد ..
لدرجة بدأت استشعر انه الله رزقني بأبناء ذكور ..
حتى أشعر بنفس احساس أمي الله يرحمها و أعرف ليش كانت تحبهم ؟
.
.
صحيح في اخر سنوات أمي الله يرحمها صارت تميزني عن الأولاد .. و تعلقت بي مرة كثير ..
و بدأت تحس فعلا بمحبتي و معزتي الشديدة لها
.
.
و فعلا ، بدأت احتار في طريقة تربية الأولاد ..
و خصوصا كل ما كبروا .. أجد نفسي في حيرة بطريقة التعامل معهم ..
اقسي عليه و لا لا ؟ أحن عليه و لا لا ؟
اضربه لما أعاقبه و لا لا ؟
إذا دلعته قالولي يصير دلوعة و بنوتة ..
لو قسيت عليه قالولي يصير معقد و ناقصه حنان ؟
لو ما عاقبته بالضرب ، قالولي الولد لازم ينضرب من صغره ، لو صار مراهق ما تقدري تضربيه ؟
إذا عودته يتحمل المسؤولية من صغره ، و يساعدني في أشياء صغيرة ..
قالولي قاسية و حرام ..
و اخر شي ..
يقولولي - الولد مصيره يكبر و ينساكي - ؟
التعديل الأخير تم بواسطة روح الطير ; 26-02-2016 الساعة 11:19 PM