رد: الاخ Neat Man , بناء الشخصية
عمري 21
أدرس في الجامعة
وغير متزوجه
ـــــــــــــــــــــــــــــــــــــــــــــــ
أفكاري فوضى ومو عارفه كيف ابدا وتحت شنو أصنفها وهل هي مشكلة بالفعل أو لا
أحاول أكون واضحة واعتذر لو فشلت
ــــــــــــــــــــــــــــــــــــــــــــــــــ ـ
عن شخصيتي :
من الصفات اللي لاحظتها فيني ولاحظت اني الجأ لها كـ حيله عشان أمنع نفسي من القلق والانزعاج
التبرير، لوم المجتمع، عبارات سلبيه ترسخ بذهني أن حظي سـيء
والمشكلة أن التبرير يكون أحيانا بالتفصيل الممل للأشخاص الغلط , اللي مو مهتمين لا بالسبب ولا النتيجة
وسبب التبرير في كثير من المواقف يكون لنفسي
بمعنى أن اشرح لهم وبنفس الوقت اشرح لنفسي
أحاول اتخلص من هالصفه لاني بعد مااخلص منها احس بالندم وشفقه تجاه حالي .
احيانا أستمد نظرتي لنفسي من خلال كلام الناس عني ونظرتهم لي
"مترددة في طرح اي موضوع يناقش شخصيتي او صفاتي مع الخوض في التفاصيل وذكر السلبيات
مضايقني جدا اني بكتب عن شخصيتي ككل وراح يقرا الموضوع اي عضو او زائر
احس اني اعرض نفسي للإهانة لما اتكلم عن شخصيتي ونفسيتي وكلي كذا
كأني أحاكمها قدام الجميع!"
ــــــــــــــــــــــــــــــــــــــــــ
عن المجتمع ؛
الشفافية والصراحة والواقعيه والمنطقية على قائمة المحظورات في مجتمعنا
أقرب مثال :
تكلموا عن فلانه أنها مكتئبة بسبب طلاقها "
وكان الجميع يلومها لأن مضت سنوات ومفروض تتأقلم وتتقرب من ربها
ويقولون أن المرأه تقدر هالأيام تعيش من غير الرجل مو مثل قبل
أنا نظرتي لها غير وطبعا هالنظره مايصير اقولها قدام الناس لان محد يوافقني عليها :
محد عاش تجربتها ياناس
وكونها قريبه من الله مايعني أنها ماتكون حزينه
واللي جالسين يرددون الحرمه تعيش من دون رجل , كلهم متزوجات ولا وحده جربت الطلاق والانكسار
وان تمنت الزواج شي طبيعي مو عيب , فطره أن المرأه تميل لوجود ذكر بحياتها وخاصه بمجتمع مكتوم مثلنا "
كثير أمور افهمها لكن مجبوره اسكت لأني لو تكلمت راح يعتبروني من وجهة نظرهم جريئه او حتى مو فاهمه
؛كثير من الأحيان اعلق على موضوع مع اهلي واتندم لاني ماوصلت لهم فكرتي بشكل واضح وبحدود استيعاب مجتمعنا
فـ اتضايق جدا واحاول اذكر نفسي اني مااعلق واتدخل.
ــــــــــــــــــــــــــــــــــــــــــــــــ
اسئلة عامة :
-هل معرفة سبب نشأت السلوكيات والأفكار مهم؟
لأن كثير من أفكاري ونظرتي للمجتمع سببها موقف بحياتي
لكن بنظري مو مهم اذكر هالسبب
لأنه ماراح يغير شي
المهم اني حاليا اناقش هالافكار واحاول اتخلص من بعضها.
-كيف مفروض تكون نظرتي للعالم، للمجتمع؟
الاحظ ان نظرتي للامور وفهمي لها مرتبطه بنظرتي لنفسي، احسها ضيقه ومحدوده لازم تتوسع وتتغير لكن مدري كيف
____________
الى هنا وانتهي
اعتذر لو صعبت الامور عليك بكل هالتفاصيل وللأسف لازلنا في بداية الطريق...