منتدى عالم الأسرة والمجتمع - عرض مشاركة واحدة

03-04-2016, 10:46 AM

#20247

مهره

عضو المنتدى الفخري

تاريخ التسجيل: Aug 2003

المشاركات: 17,491

رد: كوفي شوب الصبايا (٣)

صباح الرضا والسعادة يا سكاكر.

.
.
.
نفذت الخطة الشريرة أمس.

اتفقت أنا وعمة البنات .. وطلعت الظهر مع مهرة .. وهي يت خذت شما وراحت لبيتها.

لما رجعنا ومهرة اكتشفت إن أختها مب موجودة يت تسألني .. قلت لها: شما خلاص راحت وما بترجع.

وفتحت الكبت ولميت كل أغراض شما وحطيتها في أكياس وقلت لها باتبرع بهم للجمعية الخيرية لأن خلاص مب حاجتهم.

ركضت عند أمي .. وعقبها راحت لوحدة من عماتها تسألهم عن شما .. وقالوا لها: ما نعرف.

رجعت لي وهي تصيح: وين راحت شما؟ .. أباها ترجع.

تمت ساعتين وهي لاصقة فيني .. شوي تصيح .. وشوي تسألني عن شما .. ولما شافتني هادية قالت لي: شما مب بنتج؟ إنتي ليش مب خايفة عليها؟؟ .. المرة اللي طافت لما طلعت من الباب والحرمة اللي في الشارع رجّعتها كنتي خايفة عليها وايد .. ليش الحين مب خايفة عليها؟!! (موقف حصل السنة اللي طافت)

وترجع تقول: أباها .. أباها ترجع.

قلت لها: عندج فلانة وفلانة وفلانة (بنات عمومتها) يلعبن معاج أحسن عن شما.

قال: لا هذول غير .. شما أختي.

قلت لها: إنتي ليش تبينها ترجع؟ .. إنتي كنتي تقولين إنها تأذيج وإنج ما تبينها.

قالت: أباها وأحبها.

وقالت: أنا خايفة عليها.

وطلبت مني أدور عليها عند الجيران أو عند الدكتور.

ولما دخّلتها تنام ما ياها نوم وكل شوي تطلع لي .. وتقول خايفة بروحي.

المهم .. الخطة كانت المفروض تستمر لين ثاني يوم على أساس شما بتبات عند عمتها .. وطول اليوم كانت مبسوطة ومستانسة وهي تلعب مع عيال عمتها .. لكن وقت النوم رفضت تبات وقالت لعمتها: أنا ييت ألعب بس لكن بانام في بيتنا.

فقلت لعمتها خلاص رجعيها والأمر لله.

طبعاً ما كنت متوقعة فيلم هندي من مهرة لما شما رجعت البيت .. لكن بالفعل مهرة فيها كبرياء واستعلاء كبير على مشاعرها .. وعلى قد الصياح اللي صاحته في حضني على قد ما كانت باردة وهي تشوف أختها تدخل البيت.

لكن لما دخلن ينامن .. همست لي في أذني قبل ما تنام: ماما أنا وايد كنت خايفة على شما.

وطبعاً جعّمتني وقالت لي: إنتي قصيتي عليّ .. الله بيوديج النار.

قلت لها: إن شاء الله الله ما بيوديني النار لأنج قلتي إنج تحبين أختج وكنتي خايفة عليها وتبينها ترجع.
.
.
.
أمة الرحمن.

أنا عارفة إن السبب الرئيسي هو الغيرة .. لكن خوفي الكبير إن هالغيرة تنعكس على علاقتهن بشكل سلبي لما يكبرن.

ومثل ما قلتي مهرة تنتبه لكل التفاصيل وكل الحركات .. وتسألني: ليش ضحكتي معاها وما ضحكتي معاي؟ .. ليش لعبتي معاها وما لعبتي معاي ... مع إني مب مقصرة مع مهرة في مواقف أخرى .. ومب مقصرة معها عاطفياً أبداً .. لكنها تمسك في الموقف الآني اللي سويته مع شما.

حتى يوم أقرا عليهن وقت النوم تنتبه لوقت قراءتي على شما وتقارنه مع وقت قراءتي عليها .. أو تنتبه لطريقتي في المسح على الراس فإن مسحت على راس شما بشكل مستمر وأنا أقرا وبعدين حطيت يدي على راسها هي وأنا أقرا بدون ما أحرك يدي اعترضت وقالت: ليش تمسحين على راسها وأنا بس حاطة ايدج وما تمسحين راسي؟!!!

ومرة قلت لكل وحدة فيهن: أحبج .. قالت مهرة: ليش قلتي لها أحبج وإنتي تضحكين وقلتي لي أحبج وإنتي ما تضحكين .... أنا كنت مبتسمة لهن .. لكن ملاحظتها إني ابتسامتي لشما كانت أكبر من ابتسامتي لها!!!!

مسألة مرهقة والله يا أمة!!

تدرين لو مهرة تتصرف مع الكل مثل ما تتصرف مع شما .. يمكن ما كنت باتضايق كثير كثر الحين .. هي صحيح شخصية قيادية وتحب تأدي دور المعلمة .. لكنها إجمالاً مع كل اليهال حنونة وطويلة بال ومهتمة ومراعية وعندها شوية إيثار .... لكن مع أختها عصبية وعدوانية وأنانية وما تتحمل منها كثير .. ولا يهمها ولا تتأثر لما تطيح أو تتعور مثلاً بعكس شما تماماً .. رغم بعض الأوقات اللي يكونن فيها متفاهمات مع بعض.

وأنا علاقتي بأختي فيها خلل وما فيها عمق ولا ترابط كبير .. وعندي رعب إن علاقة بناتي تكون مثل علاقتي بأختي!

وفعلاً أنا ملتزمة بالدعاء لهم كلهم .. الله يحنن قلوبهم على بعض.

__________________

اللهم طِيبَ الأثر .. وحُسْنَ الرحيل.