اخوي ابو الفزعه

ابعطيك نصيحة من خبرتي البسيطة بالحياة ... انا قبلك خطبت و ملكت و تزوجت ولي 3 سنين .. خل الامور تهدا شوي و كلم البنت عن طريق احد يمون عليها من اهلها وقل لها انا موافق اطلقك بس بشرط ... حاول تقابلها في بيتها و يكون الوضع ريلاكس و مريح لكم كلكم ... حاول تسولف معاها و تكسر الجمود و اسألها بصراحة ايش السبب وخلك محترم جدا ولبق في كلامك وكن مستعد لسماع اي شي ... بعض البنات يخافون من الزواج ويسوون حركات غبيه لانهم ما يعرفون يتصرفون ... لكن اهم شئ تأكد انها ما تحب غيرك او عندها مشاعر تجاه غيرك او انها فعلا غير مرتاحه لك... لأنها ممكن تكون تعرف غيرك وما تبي تظلمك فتقول لك بطريقة غير مباشرة اطلع من حياتي .... انا اسف علي كتابة هذا الكلام بس هذا اللي صار في حالتي وللاسف تعبت كثير مع العلم ان طريقة التعامل كانت تختلف ما بين كلام حلو الي ملل و حظر بالواتس الي ان صرت مسوي حظر لمدة شهرين حتي صارت تدق و انا ما ارد ...
مهما صار معاك الزم الاستغفار و صلي استخاره ولا تشتكي لاخوياك همك او اقاربك ( استر علي بيتك ) ولاتعلم احد ... اكتب هنا بإسم متسعار و فضفض مو مشكلة ...

اعرف والله اللي تمر فيه و تحس بالضبط .. انا خسرت صحه و تجاره و مال و دين بسبب الي حصل لي وما ودي تصير مثلي بس بعد لاتظلم بنت الناس ابدا خلك صبور ولاتضغط كثير بس اهم شي توصل للمصارحه و كلمها كأنك صديق وليس زوج .. خلها تفتح قلبها لك و تقول كل اللي تبيه بدون اي اعتراض منك حتي لو اخطأت في الكلام لا تلومها و صدقني هي بتقول لك كل شئ حتي لو ماكان بالطريقة المباشره ... اذا احست البنت انك تتكلم بطريقة مودع راح تتكلم معاك بأسلوب مختلف ... وزي ما قلت لك تقبل اي شي لأن البنت صعب تتنبأ بكلامها ، من كثر حبها لك ممكن تقول هالكلام و يمكن لسبب ثاني ما تتوقعه ... يمكن احد كذب عليها من خوياتها وقال عنك كلام مب زين ؟؟ تري البنات يكذبون بهالامور كثير ... قدم النيه الحسنه علي السيئة في كل تفكيرك وتذكر ان اهم شئ في حياتك علاقتك بالله عزوجل وليس بأي مخلوق في هذي الدنيا ...

أسأل الله عزوجل ان يكتب لكم الخيره و يوفقكم بإذن الله ... ويستر عليك وعلي بنات المسلمين ..




اخوك سليمان