اقتباس:
المشاركة الأصلية كتبت بواسطة *المنسية *
السلام عليكم ورحمة الله وبركاته..
حبيبتي أمولة، يوجد ميزة جميلة جدا بإنه زوجك لا يستطيع أن يصرف شيء إلا لازم يقاسمك أنت وطفلك وكيف تقولي غير كريم 
بالرغم من السنوات التي عشت فيها معه مازالت في داخلك تراكمات كيف تزوجتي و ووو تلوميه على أشياء مضت وهذا بحد ذاته متعب جدا لك وله،
الأمر الآخر تعلمي أنت أصعب مرحلة عندما يكون الرجل عاطل لا يعمل، حاولي أنت تحفزيه للعمل بأي شيء حتى يلقى الشيء المناسب،
عتابك له الأشياء الماضية سيكبر الفجوة التي بينكما ويختفي الحب..
وجود زوجك في البيت عبء لنفسه وعليك،حتى إنك تكاسلت عن أداء مهامك الشخصية الإهتمام بنفسك،
لا تجعلي وجوده يبهتك عالعكس عيشي يومك وأنت في كامل حيويتكومع صغيرك..
ابحثي عن حبه في مواقفه معكم الإيجابية وستجدي بإنه موجود لم يمت لكن فقط كل ماتحتاجيه أنت وهو كسر الروتين وتجديد في كل شيء
حينها تدركي الحب موجود وبعدها ستواجهي الظروف أنت وهو باريحيه دون عتب على ما مضى عزيزتي. |
انا مقدرش أنكر ان دي ميزة فيه ودايما بقوله اني بحب فيه كده وان ده كويس وقليل الرجال اللي كده في الزمن ده بس هو مثلا مع الغير بيستخسر ممكن ميحبش يروح لحد في المناسبات عشان الحاجة البسيطة اللي هيجيبها ويجيب من اماكن رديئة وللاسف اهله هما اللي بيقولوله كده رغم انهم عشان نفسهم احسن حاجة وبيحرجني ادام اهلي اما يعمل كده
وفعلا انا جوايا تراكمات كتيره جداااااا وهو للاسف كل كلامه انتي تافهة وبكره اتغير وبيسمع من هنا ولا كانه سمع حاجة وعمره ما بيتغير ولا بيسمع كلامي ولا بينفذ رغباتي دايما اناني جدا ويعمل اللي هو عايزه وبس حتي لو مش مضطر وكتير اقوله الموقف ده بيزعلني متوعدنيش بحاجة وترجع تصدمني وهو بيكرر ده تقريبا في كل حاجة وهو لو بيسمعني ويحاول يتغير كان حالنا بقي احسن كتير والمشكله اما تبقي في مشكله جديده وافكره بالقديم ولا اقوله انت عملت كذا عمره مبيشوف نفسه غلطان ابدااا حتي في انه بيشوف اباحيات ميشوفش انه غلط في حقي واني ليا حق ازعل حتي لما بيخلف وعوده انا بس كان نفسي يحبني زي ما بحبه يحاول يسعدني بيعترف كتير انه مقصر في حقي جامد بس عمره ما بيحاول يعوضني فيها ايه لو كان اهتم بيا وبمشاعري ده انا حتي طلبت منه يجيبلي هديه كذا مره قلتله لو بريال معملهاش بلاش هدية اما ازعل يقدرني ويصالحني ليه يتجاهلني فعلا التفكير متعب جدا ليا عشان كده نفسي اخلص منه واغير حياتي واعيش لنفسي وبس ابعد عن سيطرته علي عقلي وكل حياتي
وقعدته جمبي فعلا خلتني مكسله اعمل اي حاجة وده تاعبني اهمالي في نفسي جدا وحاسه اني اكتئبت من شكلي وشكل البيت ومش قادره اعمل اي حاجة وبالنسبه للعمل هو اللي مش عايز يشتغل ويقول انا مريح شهرين عشان اهله بيساعدونا وقلة العمل مش تاعباه نهائيا لانه متدلع من اهله
بحثت عن حبه لقيت زمان لكن من سنين مشوفتش ده كله وعود مش بتتنفذ انا عندي استعداد للتغيير بس هو مش عايز يساعدني ولا عايز يتحرك ولا يعمل اي حاجة واولع انا ويجيلي اكتئاب عادي والله لو عنده ذره واحده للتغيير وكسر الروتين بجد كنت ارتحت لكن هو مأجل كل حاجة برغم انه مش مضطر نهائي للتأجيل ولا ماديا ولا ملتزم بأي حاجة واما اتكلم بكره هعوضك ووعود وكلها كلام كان نفسي يحس بيا عشان اعيش معاه واديله كل حياتي لاني مش حابه حياتي كده ليه مش نعيش لبعض ونحس ببعض كنت هديله كل حياتي واتعب عشانه فوق ما يتخيل بس لو كنت لقيت اي تقدير او اي حاجة بالعكس ندمني علي كل حاجة
كلامك بجد جميل وبيوصف حالي بس اعمل ايه فيه وهو مش عايز يغير اي حاجه ربنا يكرمك وجزاكي الله كل خير علي ردك الجميل واهتمامك بس قوليلي اعمل ايه