رد: بين نار زعل زوجي و نار الشغالة
اقتباس:
المشاركة الأصلية كتبت بواسطة زين ابيها
لكن لقافتها مؤذية
تسألني حتى عن العلاقة الخاصة!
اذا صادف ان زوجي طالع من عندي وهي موجودة
تغمز لي وتسألني .. ما راح تسبحين ؟ وافهم يا فهيم!!!!
وفيه أمور ما تنقال لأن كأنه بيكون وصف لي
أو تسألني ليش بابا اذا عندج وايد يضحك ؟؟
و ليش بابا يضحك مع ولده فلان اكثر من ولده فلان!
وليش لابسه طويل ما تلبسين قصير!
او ليش ملابسج وايد جذي ؟ اذا ما تبينهم عطيني اياهم
ومن فترة لقيتها ماخذه تيلفونها تبي تصور صورتي !
وتبي اسم ريلي واسم امه !
|
قلتي له هالكلام؟
عموماً .. وبغض النظر عن موقف زوجج .. أعتقد إنج لازم تتعلمين كيفية التعامل مع الخدامة تحسباً للمستقبل .. سبحان الله يمكن تحتاجين بيوم يكون عندج وحدة وتكونين إنتي المسؤولة عنها بشكل كامل .. وقتها مب مقبول تشتكين لزوجج منها أو تطلبين منه يتدخل لحل مشاكلج معاها إن حصلت مشاكل لا قدر الله.
لقافة الخادمة مقدور عليها بإذن الله .. وإنتي مب مجبورة تجاوبين على أسئلتها.
لما تسألج سؤال خاص فإما أنج تضيعين السالفة وتشتتين انتباهها كأن تطلبين منها شغلة معينة تجبرها تمشي من جدامج في هاللحظة .. أو كوني مباشرة معاها وقولي لها: عيب تسألين في هالأمور.
لا تهاوشينها أبداً .. فقط كوني حازمة وجادة معاها .. وخلي علاقتج معاها كلمة ورد غطاها وتعاملج معاها على قد الطلبات اللي تطلبينها منها بدون زيادة كلام وأخذ ورد .... حتى لما تييج هي تبا تسولف لج عن شي يخصها لا تظهرين اهتمام كبير واسمعي منها بدون تعليق أو مجرد تعليق مختصر عشان ما تسترسل .. إلا طبعاً إن كانت السالفة مهمة وكبيرة وتستاهل اهتمام وتعاطف منج.
وهي لما تشوف إنج مب معطتها ويه بتخفّ عنج لقافتها وفضولها.
__________________
اللهم طِيبَ الأثر .. وحُسْنَ الرحيل.
التعديل الأخير تم بواسطة مهره ; 06-05-2016 الساعة 08:31 PM