رد: معاملتي لعمي ابو زوجي
بالعكس يا سمورة.
ما دام ربي منعم عليج بأهل زوج طيبين .. وعم يحبج ويحب سوالفج ويفقدج لما تغيبين عنه .. فهذا رزق كبير ونعمة عظيمة والله.
أكيد محد يعوّض مكان الأب والأم .. لكن إذا الله رزقج بشخص ممكن يملي جزء من هالفراغ عندج فالمفروض تستغلين هالشي بشكل إيجابي.
رايي تفضفضين بجزء من اللي في نفسج مع عمج.
جزء يا سمورة .. وليس كل ما في نفسج .. يعني فضفضي معاه باشتياقج لأبوج الله يرحمه وإنه (عمج) يذكّرج بأبوج فتحسين بالحنين لحبه وعطفه وحنانه.
لكن لا تتكلمين مثلاً عن إحساسج بالنقص لأنهم لا يزالون أسرة متكاملة وكلهم مع بعض وإنتي لا.
أما زوجج فرأيي تخلينه برا هالموضوع.
الله يرحم أبوي وأبوج ويجعلهم من أهل الفردوس الأعلى.
__________________
اللهم طِيبَ الأثر .. وحُسْنَ الرحيل.