السلام عليكم ورحمة الله وبركاته ..

اخواني واخواتي .. انا في حيره وهم وتردد و مشاعر متلخبطه ..

انا متزوجه من 6 شهور وحامل .. بحكيلكم من البدايه ، خطبني قريبي وكانت فترة الملكه 7 شهور فيها حب واشتياق يحبني بجنون يجيبلي هدايا يبغى يشوفني بإستمرار ، لو مر كم يوم وماشافني يتنكد ويبكي ، طول الوقت يبغى يكلمني ويسمع صوتي لدرجة مرات احس انه يغار من اهلي اذا جلست معاهم ويغار من صحباتي ، كان هالشيء عاجبني و مبسطني لاني كنت احس بحبه الشديد لي ، وبنفس الوقت مضايقني لانه كان زنان وزعول على اي شيء يزعل كنت احاول اداريه واراضيه واسوي اللي اقدر عليه عشان ابين له اني ادور رضاه بس مايبين في عينه ، بالعكس يشوف اني بارده ومطنشته وما اعطيه بال ، اعطيته من الحب والكلام والزيارات الشيء الكثير بس برضو يشوفني مقصره في حقه وما اعطيته شيء ويشوف انه ماقد قصر معايا بشيء وهو اللي فيه الحب والحنان وانا لا ، صارت مواقف بيننا احترت فيها ليش يتصرف معايا كذا معقوله اللي يحب يسوي كذا ؟ موقف ما انساه .. صباحية زواجنا تكلمنا مكالمه طويله وصار بيننا هواش بسيط انا جلست ابكي قلت ترا اليوم زواجنا الله يخليك لا تسوي كذا .. جلس يقول والله لو الحين زواجنا ماعلي .. يعني ماهمه ابدا بكاي والترجي اللي ترجيته وانه صباحية زواجنا .. حرق قلبي بتصرفه هذا خلاني اخخخاف منه ومن العيشه معاه .. عديت وحاولت ارضيه و تم زواجنا على خير .. في ليلة الدخله حاول معاي وانا مرا خايفه لكن احاولت اتجاوب معاه مهما كان الرجل مايقدر على الامر هذا لوحده اذا مافيه تجاوب لكن لما استصعب عليه الامر قام يصارخ ويعصب اذا سويتي كذا بقوم اطلع واروح بيتنا !!! انا هنا فعلا طار الامان اللي في قلبه له كككيف يتكلم في ليلة الدخله كذا . المفروض يهديني يحتويني مو يتكلم كذا ، صارت بيننا مواقف كثيره يتكلم فيها بأساليب ماتدل على ان هذا الانسان يبغى الزواج بالعكس احسه مو متمسك ابدا فيني رغم انه يحبني حيرني معاه صرت مابين حبي له وخوفي منه .. حنون مرات ويحب يهديني مرار وادري انه متعلق فيني بس ليش يسوي معايا زي كذا !! عجزت افهمه جيته بكل الطرق بس مانفع معاه ، دايم يسيء الظن فيني مستحيل يفكر ياخذ الامور مني بحسن نيه .. مثلا : زارتني اخته قبل فترة واعطتني ظرف فيه مبلغ مال لما راحت من عندي رحت قلت لزوجي شفت الكرت اللي على التسريحه قال ايوا بس مدري ايش فيه قلت اختك اعطتني اياه في مبلغ خذ المبلغ هذا انا مو محتاجته ولو بحتاج شيء بقولك ادري انك مو مقصر معي وبتعطيني ( قلتله هذا الكلام بحكم ان زوجي مو موظف وكان مطفر ) قال لا خليه معاك قلت لا خذه انت والله ماني محتاجته بشيء قال ليش متحسسه ان اختي اعطتك فلوس وكانت نبرته معصب .. يعني انا متصرفه معاه هالتصرف ويسيء النيه فيني كذا .. والله قهر قلبي .. حاولت بعدين افهمه اني قلت كذا عشان اعطيه الفلوس واني ماني بحاجتها والا ابدا انا مو متحسسه من اخته بالعكس .. بس هو بقى على رايه ويشوفني متحسسه كنت متوقعه اكبر في عينه او يجي يقول حبيبتي ادري ماقصدك شيء بس خلي الفلوس معاك .. مشكلته يصر على كلامه مستحيل يتراجع او يبين لي انه غلط او ندم مع ان فيه مواقف عشان يتمسك فيني وفي زواجنا لازم يعتذر او عالاقل يبين انه ندمان .. مثلا مرا صار بيننا خلاف وهو انه يبغاني امشي في السوق عيني عالارض قلتله كيف تكون عيني عالارض صعبه بجلس اطيح او اصكع بالناس رغم اني اكلمه بهدوء وابتسامه قام وعصب ونافخ وقال اذا انتي ماعندك استعداد تخسرين بيتك انا عادي عندي اخسره .. هالكلمه هذي جات على قلبي مثل الصاعقه .. دمرت كل احساس امان جواتي فيه .. ماكنت اببغى ابكي بس بكيت عنده غصب عني بكيت بكيت لين ماحسيت روحي بتطلع .. بعد فتره قلتله تدري انا كل ماجيت بنام اتذكر كلامك لي وينحرق قلبي قال ليش قلت كلامك كان غلط وخطأ .. قام يكابر على خطاه وانه ماقال شيء غلط ابدا وان تصررفي هو اللي حده يقول هالكلام ؟ ايش الخطأ اللي انا سويته ؟ عشان جالسه امشي بالسوق وعيوني تطالع في المحلات بشكل مستقيم ؟ والله العظيم اني بنت ما احب حركات البنات والنظر والتميلح وهذي الاشياء بالعكس احاول وهو جنبي احترمه كرجل يمشي معي بس يشوف العكس اني ما احترمه ابدا واني انسى انه زوجي ومن هالنيه السيئه فيه تجاهي .. مايشوف اي شيء اسويه له بالعكس ينتقدني اكثر ما يمدحني رغم اني دايم اقوله ترا كلامك لما تمدحني يدفعني اسويلك اكثر يعطني طاقه اعطيك اكثر .. بس دايم يشوف اني مقصره معاه وبحقه رغم اني اعطيه من كلام الحب والحركات الرومنسيه والحنان حتى مرات ما اروح لاهلي عشان اقضي وقتي معاه حتى فترة حملي الثلاث الاشهر الاولى كنت متوحمه عليه بقوه بس تحملت وجلست في بيتي واحاول قد ما اقدر اعطيه وما اقصر معان بشيء حتى بالعلاقه .. بس ماكان يعذرني ابدا بالعكس يلومني بإستمرار .. رغم اني عروسه وحملت بسرعه ماشاء الله والمفروض اتدلع زي البنات بس بالعكس من قلقي انه ما اقصر معان بشيء خلاني اعطيه اكثر واكثر عشان مايحس بالفقد مني ..ليت بيّن بعينه بس .. مرات لما اساله انا مقصره معاك بشيء ( من باب حرصي اني ما اقصر معاه ) يقول ماهو انا فلان ولد فلان اللي يحس بالتقصير .. بإختصار ماخذ الامور بكبرياء وتحدي ومو انتي اللي تهينيني وتذليني رغم اني والله العظيم ماني من النوع اللي كذا بالعكس اموت فيه واحترمه واعطيه حقه كرجل زوج محترم ..

مع العلم ان انا عمري 23 وهو 32

انا خلاص طفشت ومليت من الضغط النفسي اللي مسببه لي قلق اني اكون مقصره معاه بشيء وخوف من بعض كلامه مايعطيني الامان ابدا .. طفشت من كثر الانتقادات والاهانات اللي اسمعها منه حياتي معاه صارت ضضضغط نفسي لدرجة اني فكرت انفصل عنه بس ما اقدر احبه مرا وفي بطني بيبي حرام اظلمه ..

الله يخليكم انا بحاجة مشوره لاني ماني عارفه ايش اسوي فقدت الامان معاه جدا ما احس بأمان عايشه بضغط نفسي بس واخاف افقد الحب بعد ..