اولا اختي اكبر غلط هو التأليف في نظام الحميه وممارسة الرياضه اعتباطا ..
الفحص ثم الفحص ثم الفحص .. من بعدها يقرر الدكتور مع اخصائي التغذيه كيف يقدر اخينا بالله انه ينحف .. يعني اول خطوه تبحثون عن السبب .. لاني مريت في مثل ها المرحله وكنت اتبع نظام غذائي من النت ومشي مع جري لمدة ساعه كامله ولا خفيت .. بس لما عملت الفحص طلع عندي احتباس املاح .. فكانت العله في اني لما اشرب ماء وامارس الرياضه تتفاقم المشكله اكثر فكان الحل في البدايه اني اكثر ماء بدون رياضه وخفيت قرابة الــ 20 كيلو بدون رياضه ..
لذلك اول خطوه تبحثون عن المشكله ..
النقطه الثانيه كل ما زاد العمر قلت قدرة الجسم على حرق الدهون .. فأنا قبل الثلاثين كانت اموري في السليم .. اما بعد الثلاثين من العمر اصبحت السيطره على الوزن صعبه جدا ..
النقطه الثالثه .. لا تضغطين عليه .. انا كنت امشي في بداية المطاف على اني انزل نص كيلو او كيلو بالشهر .. الموضوع يبغاله صبر وموضوع الضغط ابدا ما ينفع .. خصوصا نحن كعرب اكلنا كله دسم ودهون وبلاوي سوده .. عكس الاجانب اكلهم اليومي يساعدهم ..

بعد استشارة الطبيب خل ينزل برنامج في الاندرويد او الابل ايهما يستخدم الاول للمشي وهو NIKE يحسب لك كم تمشي في اليوم
والثاني لحساب السعرات الحراريه ممتاز جدا .. يحصل فيه نوع الاكل وكم سعره حراريه ويحسب له كم لازم يحرق وكم يمشي من الالف للياء ... MYNETDIARY
وان شاء الله انه راح يستفيد ..
وتنزيل الوزن مب عشان يصير شكله احلى .. لكن عشان صحته

تراها صعبه على السمين انه ينحف .. عكس الضعيف يحسب الموضوع سهل .. اسألي المجربين ^_^

وعلى وزنه الحالي لا يفكر ابد في العمليات الجراحيه ... العمليات هذه للحالات الميؤوس منها للي تعدت الــ 200 كيلو .. اما زوجك وزنه سهل ينزله ..

..