على قد ما ضحكتني بنتك الله يسعدها على قد ما حسيت بشعورها
الله يخليها لك واخوها يا قلبي عليه مو داري عن شي
(وصدقوني هذا مو شي عادي بل مؤشر لامر اخر في شخصيات ابناءكم في الكبر
ما اخوفكم لكن انبهكم)

انا احكيلك انتي واختي وفا من واقع تجربه عشتها بنفسي
كنت وانا صغيره قريب من وضع ابنك وبنتك يا سموره بس ما اقرف من كل شي
تخيلي كنت اقرف من شغله وحده بس.. تخيلي ايش هي؟
كنت اقرف من وحده من اخواتي هي بالذات!!
مع انها جميله وما فيها اي عيب خلقي ممكن يكون هو السبب
بس سبحان الله الوسواس اذا تنح على شغله
خلاص مالك فكة منه الا بقدرة الله

كان عمري وقتها يمكن 12 او 13 سنه
كنت كل ما لمستني اختي هذي من بد اخواتي
على طول امسح المكان اللي لمستني فيه
اسولف معها بس لا تمس جسمي حتى لو بالغلط
اذا لمست جسمي اتكهرب ولا ارتاح لين امسح بيدي مكان ما لمستني
حتى هي ايامها لاحظت وقالت لي ليش تمسحين جسمك اذا لمستك
بس والله كان غصب عني شي بدون شعور مني اسويه

لكن لما كبرت عااااادي جدا تلمسني وتضمني ولا احس بشي
لكن الوسواس تحول للصلاة والطهاره وخااااصة الصلاة
يا الله ما تتخيلين معاناتي معها
وانا زي ولدك ماااا احب ادخل الحمام بعد احد مباشرة لازم استنى شي 5 ..10 دقايق
وسببي حتى تروح الرواءح بعده
واذا كنت مستعجله ودخلت ورى احد وشميت ريحه
الله لا يوريك انواع الاقرف منه
واجلس لامه خشمي بهدومي او اي شي معي يخفف الريحه
بس هذي ما اعتبرها مشكله عندي لاني ممكن ادخل بس بقرف فقط

اما في الصلاة والطهاره فقد عانيت لدرجة كنت ابكي
ابغى ادخل في الصلاة ما اقدر
وجلست على وسواس الصلاة يمكن 10 سنوات
الان خف بشكل كبييييييير والحمد لله
ومازلت اعاني من شي بسيييط من اثاره شيء لا يذكر

ولو كنت توجهت بعد الله للعلاج يمكن ما كان طول معي لعشر سنوات
وعلى فكرة حالتي تعتبر بسييييطه
امام ما قرات من حالات الوسواس فيها شي جنوني ومتعب لاصحابه
وتحزنين عليهم
(كل ما سبق كان وانا صغيره والان الحمد لله باحسن حال
سوى القرف من دخول الحمام بعد احد لمجرد القرف من هذا الامر
اما الصلاة فزال الوسواس والحمد للهلكن بعد معانة لعشر سنوات او اكثر)


نجي لابن اختي عمره 8 سنوات حاليا
زي ابنك في حكاية الاكل
(لاحظي كل انسان يمسك معه الوسواس بشغله غير
انا باختي لما كنت صغيره وبالصلاة بعد ما كبرت
وابن اختي مسك معه في اللحم)
تخيلي ما ياكل اللحم ويطالع في اللحمه بقرف اتوقع يتخيله شي حي😉

شخصيا ارى ان تعرضي ابنك على استشاري اطفال
حتى اذا فيه مؤشرات لوسواس بشكل اخر اذا كبر تداركوه من صغره

__________________
( اللَّهُمَّ آتِ نَفْسِي تَقْوَاهَا، وَزَكِّهَا أَنْتَ خَيْرُ مَنْ زَكَّاهَا، أَنْتَ وَلِيُّهَا وَمَوْلَاهَا )