السلام عليكم ورحمة الله ..
في موضوعي راح أتكلم معاكم بالعامي أحسن عشان يكون كلامي قريب لقلوبكم وتقدروا تحددوا وش اللي أحس فيه بالضبط
السؤال الذي كتبته في موضوعي دائماً يتردد في بالي
في الفترة الأخيرة يا أخوان (أي فترة مابعد الطلاق) حسيت إن شخصيتي تغيرت 180 درجه

ممكن تكون تغيرت سلباً أو ايجاباً ما أقدر أحدد ..
يعني أحياناً أحس اني انسانه متبلده في أمور .. وممكن صبووووره بشكل مو طبيعي .. وصرت أتوقع حدوث الأشياء قبل أن تقع .. واتعامل مع الصدمات بقلب قوي
دمعتي ماصارت تنزل بسرعه .. وربي ياناس ماعد صارت تنزل
ممكن أكون ساكته وحزينه من داخلي بسبب وفاة عزيز بس دموعي ماتنزل .. أحيان أحس قلبي بيتقطع حزن بس دموعي نشفت .. وين دموعي ياترى
زمان أبسط شي يبكيني .. كان عندي احساس مرهف .. اسمع بس انشوده حزينه أبكي بسرعه .. أشوف أي موقف محزن اتأثر

حالياً قلبي تغير .. صرت وحده ثانيه .. انسانه ثابته وصابره صبر أنا أستغرب منه
أو ممكن أقول ايماني زاد وصرت انسانه راضيه بالقضاء والقدر وأكثر شي أفكر فيه انه هذي دنيا فانيه
فليش أبكي على الميت .. الميت راح عند ربه وارتاح

احنا اللي لسه ماندري وش مخبي لنا القدر .. احنا اللي ممكن نصادف أشياء ممكن مانستحملها ..

هل ظروف السفر والغربه والدراسه وحملي لمسئولية نفسي واني كنت رجل وامرأه مع بعض كان لها الأثر الكبير في تغيير شخصيتي ..
خصوصاً ان طلاقي كان فترة دراستي وابتعاثي .. فجأه لقيت نفسي وحيده وحولي تحديات كثيرة تمنعي من اكمال دراستي ومع ذلك اكملت دراستي بتفوق ونلت أحسن المناصب في عملي والحمدلله
.. أو ممكن تحطيم المجتمع والناس كوني لم انجح في زواجي ..

معقوله جميع هذه الظروف صنعت مني انسانه بهذا القلب
وين قلبي المرهف .. قلبي اللي يرق بسرعه
في وضعي الحالي عقلي صار يتغلب كثيراً على عاطفتي
مع اني أحس بأن عاطفتي ماتت واختفت من زمان ..

__________________

(( لا شيء يجعلنا عظماء سوى ألم عظيم ))