المشاركة الأصلية كتبت بواسطة غـادة..

عزيزتي اي ابتعاث وبرنامج خادم الحرمين سكروه ؟ الا اذا بتبتعثين بفلوسك هذي حكاية ثانية
الشيء الثاني ما اعتقد مسموح تبتعثين بدون موافقة ولي الامر
ثالث شيء طيب وتطلقتي وابتعثتي مستوعبة بتصيرين لوحدة مع ثلاث اطفال !!! اي متعة واي وناسة واي انبساط تتكلمين عنه مستحيل ياعزيزتي المسؤولية بتصير دبل ثلاث مرات .

باختصار ماتقدرين تسوين شيء لحد ما تستقلين ماديا ومارح تستقرين ماديا حتى تتوظفين ولا رح تتوظفين حتى تدرسي جامعة بتخصص ( كويس ) بعدها تقدرين تستقلين بحياتك .

اعتقد المشكلة انك استوعبتي انك ماعشتي حياتك .. شفتي اللي حولك صديقاتك واهلك والبنات بانستغرام عايشين حياة غير اللي عايشتها وحسيتي انك محرومة من شبابك ولا استمتعتي ..

ولا رح تستمتعين بهالطريقة زي ماقالت مسك صك الطباق مارح يبعث لك السعادة نهائي ، منطقيًا حتى لو تطلقتي فانتي بترجعين لنفس البيت اللي تكرهينه ..
مارح يتقدم لك شخص كويس لان معك 3 اطفال وزي مازوجك ابوك وانتي صغيرة بيزوجك عصب وانتي بهالعمر

لو أنا بمكانك بعيش حياتي بالمعطيات اللي معي .. بحاول استمتع بعمري ..
اول شيء مبسكن ببيت قريب من اهل زوجي حتى يتدبس فعلاً
الشيء الثاني بخلق لي بيئة مريحة .. اتعرف ع ناس .. ادرس بدار تحفيظ او اي شيء اختلط مع الناس .. اتابع لي مسلسلات حتى اشبع ..
اكتشف ايش هي هواياتي !
نعم غلطت وحملت ورا بعض وجبتهم وانا صغيرة .. لكني بحط هدف تربيتهم بقائمة اهدافي .. بعتبر هالشيء مشروعي الاول بالحياة ..
بالوقت الحالي اولادي صغار ومحتاجين لي ..
بربيهم كويس وبقرا عن التربية .. اسوي لهم روتين مريح لي مثلا من 9 ينامون ويبدا وقتي الخاص .. بقرا القصص والكتب اللي احب .. بشوف افلام وبتابع مسلسلات ..
بسوي لي رياضة تضبط لي جسمي بعد الحمل والولادة .. واذا احتاج مثلا تقويم اسنان بسويه .. اذا احتاج علاج لبشرتي مارح ابخل ع نفسي
بهتم بنفسي اكثر وبحب نفسي وبدلعها لان ماعندي احد يهتم فيني
بدرس بالجامعة وبهتم بدراستي وبحاول اشد حيلي واتخرج بمعدل حلوو حتى احصل لي وظيفة احلى
بحاول احسن علاقتي مع زوجي .. لاني انا المستفيدة .


هذي بتكون خطة الخمس سنوات القادمة .. بعدها بحط لي خطة ثانية اذا صار عمري 28 بشوف ايش اولوياتي


هذا لو انا بمكانك