أخي الكريم .. قريت ردك ولا قدرت أخرج بدون ما أرد

الله يعافيك خليك انسان واقعي .. أبعد عن المثالية والمفروض والمفروض ..

أوكي احنا عارفين ان الشرع ضمن لذي المطلقة نفقة وغير وغيره وغيره ..

هل انت غافل على تحايل الرجال بهذا الزمن ؟؟

شخص وصل للطلاق وطلق زوجته وهو انسان غني وربي منعم عليه.. وألزمه القضاء بالنفقه والمسكن وجميع الأمور اللي ذكرتها .. ودب الحقد في قلبه على ذي المسكينة .. كيف يلوي ذراعها ؟؟ علمني !!

ما قدامه الا يساومها بين انه يسحب عيالها منها أو تتنازل على النفقة .. والمسكينه لو هي متعلقه بعيالها وخايفه عليهم راح تختار انها تتنازل على النفقه .. وتراها حصلت كثير لبنات أعرفهم شخصياً

طيب في ذي الحالة مين اللي راح ينقذها؟؟ مالها الا وظيفتها يا الطيب
خلينا واقعيين شوي

أخي الكريم المحاكم مليانه قضايا من هذا النوع ..

أنا ما خرجت عن موضوعك .. أنا عطيتك حيثيات على المدى البعيد .. انا وضحت لك ان الحياة الزوجية ممكن تمر بخلافات الله بها عليم .. ابتعد عن المثاليه شوي .. هذا واقعنا للأسف

الوحدة المفروض تثق بالشي اللي في يدها .. وزوجها على عينها وراسها تخدمه وتعطيه حقوقه كاملة لكن لا تقول هذا الزوج بيكون حلا معاي طول العمر ومستحيل يذلني ويخونني

لازم في حياتنا مع الشريك لا نرفع سقف التوقعات ونتوقع أسوأ الاحتمالات ..

قلت لك احنا في زمن الله المستعان كثرت فيه الحالات النفسية .. والله الواحد صار يمشي ويده على قلبه ويتعامل بحذر مع الكل ..

ووظيفة الزوجة راح تحقق لها الكرامة هي وعيالها لين الله يتوفاها برحمته ..


نجي لنقطة انك تقول لو مات الزوج راتبه يصرف للزوجه وعياله .. طيب كلامك صحيح
افرض ان هذا الزوج معاه بنات بس .. وعنده أهل واخوان ظالمين .. يقدروا يا اخي يلعبوا في حق الايتام وياخذون فلوس البنات إذا كانوا طماعين ومايخافون الله

وقتها مين بينقذهم .. والله ماراح تنقذهم الا وظيفة أمهم لو كانت موظفه ..

طيب بعطيك قصتين على السريع ..

وحده من المعارف جاتني الاسبوع الماضي بملفها تبغى وظيفة .. تقول والله تطلقت منه وياليتني ارتحت .. طالبت بنفقه لعيالي وطليقي فصل من عمله وبكذا ماقدرت اخذ حقي من المحكمه واطالبه بالنفقه .. انسان عاطل باطل وابشرك من عايله غنيه .. كيف تستقطع لي المحكمه من راتبه مثلاً نفقه للاولاد وهو ترك وظيفته ..

عيالها ماتوا جوع والضمان اللي يصرف لها كمطلقه ما يكفيها في مصاريف عيالها ومدارسهم

هيا قول لي بالله لو كانت موظفه هل بالله ستعاني هذه المعاناة ؟؟


اعطيك قصة ثانيه وحدة توفى زوجها وهو يشتغل اعمال حره بدون وظيفه .. وقدر الله ومات هذا الزوج في حادث .. الأسرة عانت بعده في الدخل .. هل أعماله الحره ذي نفعت الزوجه الضعيفه وجابت لها دخل شهري ؟؟

يا اخي احنا في زمن صعب ... والله يعين الحرمه على اللي يجيها

والله لو تدخل مقر عملي وتسمع حارسات الأمن اللي شغالين من 3000 ريال .. كل وحدة تحكي لك معاناتها .. وما توظفت الا بعد ما ذاقت المر من زوجها وهذا المرتب البسيط تصرف منه على عيالها

يا اخي اذا كنت انسان مثالي لا تظن الغالبيه العظمى من الرجال مثلك

انعدمت المسئوليه .. انعدمت المباديء .. الرجال اللي مثل ابوي وابوك ماتوا وراحت علومهم الطيبة

__________________

(( لا شيء يجعلنا عظماء سوى ألم عظيم ))