حبيبتي رينول
اعرف انك شخص كويس عاطفي يبحث عن الحب في محيطه
كلام زوتا صح
سالفه ان كل فعل له رد فعل بالبشر ماتجي
يعني انا اعطي وكريمه وبكون محبوبه بالجهه المقابله مو دايما
بالعكس الطيب و الحبيب صار مكروه وينفرون منه بالزمن
او يلقونه فريسه سهله ويعطونه على راسه
هل معنى هذا اننا غلط
نغير من انفسنا عشان الناس
بمعنى فلانه ما توصلهم وثقيله مع هذا طايرين فيها ويحبونها
بسوي مثلها عشان القى نفس المعامله
غلط كذا بتتعبين مره
ولا بتلقين النتيجه الي ببالهم
لا تخلين حبهم اكبر همك
ولا مبلغ علمك ولا غايه حياتك
عامليهم بما يرضي الله وتوكلي على ربك
وخلاص لا تنتظرين المقابل
انتظري المقابل في ثقافتك وصحتك
مثلا لما تجتهدي على جسمك ودايت ونادي
تنتظري المقابل صحه وعافيه وجسم حلو
هذا مثال
لكن ابدا لا تنتظري المقابل من البشر
بتسوين شي سويه لانك حابه وقبلها لوجه الله ولا تنتظري كلمه شكر من احد
استغني رينول استغني
مااقصد انعزلي عن الناس
لكن استغني عن حبهم عن كلمه منهم عن مجامله منهم
استغني بنفسك واسعادك لنفسك وقوتك واهتمامك ودينك قبل كل شي
بالنسبه للموقف الي اذكرته للامانه اشوفه عادي ولا فيه تقليل احترام لك
امي احيانا تقول ليت عيالي كلهم مثل فلان
او ليت البنات كلهم مثل فلانه
هل معناته امي ماتحبني او فيني شي
تراها مدح بصيغه مبالغه مهب تحقير او تقليل بشانك
طنشي وانا اختك ولا تتعبي قلبك بصغائر الامور
حبوني ماحبوني مهب لازم
الاهم انتي تحبي نفسك وتكبري عقلك وتعيشي حياتك