شكرًا جزيلاً لردودكم شخص شخص ..
من طرحي للموضوع وأنا أحدث الصفجة وعند كل رد أفكّر أكثر

سلبيّات الوظيفة بالنسبة لي بعدي عن زوجي وبعد ابنتي عنه ..
وللأسف زوجي عنده عيب جدًا مزعج وهو إني إذا سافرت عنه مستحيل يتواصل معي !
مو بس أنا حتى أهله , وهم ببيتهم يوميًا يمرهم ويشوف أخبارهم بس يسافرون بالأشهر مستحيل يتصل ويسأل عن أخبارهم ع الرغم من امتعاض والديه من هالطبع , وبنهاية صاروا هم يتصلون يطمنونه عنهم !

هذا بالنسبة لي مو شيء سهل , أحب تكون علاقتي الزوجي مستقرة وتزعجني جدًا النزاعات والتجاهل .

الشيء الآخر أنا ما أعرف إلى متى راح يستمر الوضع وأنا بمدينة أخرى , بحثت في النت ولقيت ناس بقرى نائية من 8 و 9 سنوات ولسه ماجاهم النقل للرياض ! وأنا بصراحة ماعندي استعداد للمرمطة هذي .

أما النقل لمدن قريبة من مدينتي الرياض فهم نزلوا مدن تبعد عن الرياض أكثر من 300 كيلو ! ومستحيل إني أروح يوميًا سنييين .. ماعندي صراحة القدرة ع الصبر .

والأهم رأي زوجي بالموضوع .. بالبداية كان متحمس وفتح قوقل مابز وبحث لي ع أقرب الأماكن وكذا وجاب لي حلول .. هذا أمس ..
اليوم قال لي اصرفي النظر عن المدن القريبة من الرياض (تبعد 315 كم وفوق) وحطي فقط منطقة أهلك ,
قلت طيب وأنت ؟ مارح تنقل معي ؟ قال مستحيل صعب جدًا النقل بعملي .

وبعد المغرب قال لي اشتري راحة بالك بدل ال8 اللي تاخذينها بغربة خلّيك بأهلية جمب البيت ويجيك 6 وأنت مرتاحة .

واستخرت وأحس صدق ماحد الله لكل هالغرابيل ! خصوصًا الحمدلله حالتنا المادية جيدة ومو محتاجة أبدًا ..

أرسلت إيميلات لكذا جهة بالرياض , ودعواتكم يتيسر الموضوع وأرتاح من العطالة والروتين

وشكرًا مرة ثانية ع ردودكم سهّلت لي اتخاذ القرار جزاكم الله خير