مسز داني بذكر لك موقف جدا مشابه حصل معي موخرا..
انا عندي سائق خاص يوصل بناتي المدرسة ويرجعهم ..
حماي ساكن ببيت ملاصق ببيت ام زوجي وبناتها وعندهم سائق خاص فيهم مشاركة بينهم .. انا بيتي يبعد عنهم شوي ..
لما سافر سايقهم طلبو ان سايقي يمر على ابناء حماي (البنت في مدرسة بنتي والولد في طريق اخر.. وبناتي جميعهن مدارسهم متلاصقة ..)
اللي صار ان لازم اصحي بناتي ابكر من المعتاد واجهزهم بسرعة ويطلعون قبل الموعد بوقت كافي لأنهم يمرون بيت عمهم وبعدين يوصلون ولدهم ثم بناتي وبنتهم.. كثير احيان عيال حماي يتاخرون في الخروج للسيارة فالبنت تبكي والولد يعاند .. بناتي صارو يوصلون بعد الجرس .. بالاضافة الى شكوى السايق من الازعاج يقول مايقدر يركز وكم مرة اوشك انه يصطدم بالسيارة بسبب الازعاج والحركة الكثيرة في السيارة.. سكت وتحملت تقريبا 4 شهور وقلت معليه هم محتاجين ومتورطين فترة مؤقتة ويرجع سايقهم .. سايقهم راح وانتظرو موعد رجعوه وقال انا تزوجت وماراح ارجع.. قلت معليه قريب يخلص الفصل ونرتاح .. في اجازة الصيف وصل سايقهم الجديد. ماعنده رخصة سواقه وصار يتدرب ويمتحن ويرسب .. انتهت الاجازة الثلاث شهور وهو ماحصل الرخصة .. انا قلت اكيد دبروا حالهم .. مثلا ابوهم يوصلهم .. او امهم اللي عندها رخصة سواقة بس ماتبي تسوق وربة منزل يعني فاضية وتقدر توصلهم وتجيبهم .. وعندها خادمة تجلس مع ولدها اذا بتوصل عيالها .. او تخليه عند ام زوجي اللي بين بيتها وبيتهم باب .. او يتفقون مع سائق يوصلهم او حتى باص المدرسة .. يعني خياراتهم كثيرة ..
تفاجات ليلة اول يوم دراسي بحماي يتصل بسايقي ويقول له من بكرا توصل عيالي كالسابق..
انا عصبت عصصصبت لأنهم المفروض يكلموني ويشوفون ظروفي هل اقدر ابعث سايقي واتحمل الاستيقاظ الباكر والفوضى النهارية والبهدلة وفوقها يوصلون بعد الجرس .. لكن بدلا من ذلك تصرفو من نفسهم وكلمو سايقي ومأنه يعمل عندهم وتجاهلو اني صاحبة الكلمة.. وبالرغم من مقدرتهم على توفير مواصلات لعيالهم اعتمدو على سايقي وماهمهم شي ثاني ..

قلت خلاص اللي مايستحي لا تستحي منه .. بعثت على الواتس اب حق زوجة حماي اعتذرت منها بطريقة لبقة عن توصيل عيالها بسبب الاستيقاظ الباكر والوصول متأخرا والازعاج اللي يصير في السيارة مع كل الاطفال ..
ماردت علي بولا حرف .. عرفت انها زعلت .. بس انا الحق معاي .. 3 شهور اجازة مادبروا اعمارهم وبليلة الدوام يصدموني جذي؟ اعتقد انا ماقصرت وتحملت شهور وغيرت تسيير حياتي عشانهم .. ومن حقي اشوف اللي يناسبني ..